Kabineti i qeverisë gjermane miratoi zgjatjen e të ashtuquajturës “Rregullore për vendet e Ballkanit” (Westbalkanregelung) deri në vitin 2023. Kjo rregullore parashikon qasjen më të lehtë në tregun e punës gjerman për ata/ato punëtorë me një kualifikim profesional apo gradë akademike. Megjithatë për të gjithë Ballkanin perëndimor është caktuar një kuotë tavan prej 25.000 personash në vit, shifër e cila orientohet në bazë të numrit të personave, të cilët kanë filluar punë vitin e kaluar sipas kësaj rregullore. Për krahasim, gjatë vitit të kaluar kjo shifër ishte 27.000, informon foldrejt.com.
Edhe personat pa kualifikim profesional mund të punësohen në Gjermani, nëse kanë të siguruar kontratën e punës si dhe kalojnë kontrollin e përparësisë (Vorrangprüfung), në bazë të të cilit zyra federale e punës kontrollon nëse për pozicionet vakante ka kandidatë nga vendi apo Bashkimi Evropian.
Sipas ekspertëve gjermanë, për pesë vite me radhë, rregullorja e Ballkanit Perëndimor ka mundësuar sigurimin e fuqisë punëtore të nevojshëme në sektorin e shëndetësisë, përkujdesjes ndaj të moshuarve, atë të gastronomisë dhe ndërtimit. Vetëm gjatë vitit 2019, nga Shqipëria janë punësuar 1300 persona të kualifikuar në fushën e shëndetësisë (infermierë, mami apo dhe kujdestarë për të moshuar), pa përfshirë këtu mjekët me gradë akademike, të cilët gjithsej arrijnë shifrën 1000. Ndërkohë sipas Eurostatit Shqipëria ka humbur gjatë viteve të fundit 20% të popullsisë së saj.
Ndërkohë Komisioni Evropian pritet të paraqesë në Shtator programin e tij të investimeve në Ballkanin Perëndimor, të planifikuar fillimisht për në Maj, i cili do të përqendrohet ndër të tjera dhe në çështjen e minimizimit të emigrimin të punëtorëve të kualifikuar nga Ballkani perëndimor.
Po qeveria Shqiptare/Kosovare/Maqedone çfarë strategjie ka për mbajtjen e fuqisë punëtore të kualifikuar në vend? Sjelljen e fuqisë punëtore nga vendet e Afrikës? Ka strategji emigracioni dhe integrimi për këtë të fundit? Vendi po përjeton një krizë të theksuar shpopullimi, i shoqëruar ky edhe me mplakjen e popullsisë./Foldrejt.com
