Ambasadori i Serbisë në Shtetet e Bashkuara të Amerikës (ShBA), Marko Gjuriq, ka shfrytëzuar rastin të sulmojë Kryeministrin e Kosovës Albin Kurti, duke thënë se ai është politikisht dhe faktikisht një person i padëshirueshëm në Uashingtonin politik, sepse veprimet e tij janë dëshmuar se janë “varrmihësi i Kosovës si shtet i pavarur”, transmeton Fol Drejt.
“Ajo që po ndodh në Ballkan nuk është ndër prioritetet e publikut politik amerikan, ata janë të interesuar për Kinën, Rusinë, pak për Lindjen e Mesme… Çdo gjë tjetër që ndodh në botë është temë diskutimi ekskluzivisht kur shfaqet në lajme” – është shprehur ai në “Happy TV”.
Gjuriq shtoi se detyra e tij nuk është vetëm t’i japë Uashingtonit faktet për atë që po ndodh në veri të Kosovës, por edhe të punojë që Serbia dhe SHBA-të të lidhen në mënyrë interesante përmes bashkëpunimit ekonomik.
“Drejtori i Zyrës së Qeverisë për Kosovën Petar Petkoviq, duhet ta shohë faktin që ekstremisti Kurti ia ndaloi hyrjen në Kosovë si kompliment për punën e tij. Është mirë kur një ekstremist si ai nuk e miraton politikën tënde”, tha Gjuriq.
I pyetur për sanksionet e vendosura nga SHBA ndaj kreut të Agjencisë së Informacionit të Sigurisë (BIA), Aleksandar Vulin, ai tha se ato janë të natyrës politike dhe se Serbia ka vepruar me moderim duke kërkuar nga Amerika që të vërtetojë pretendimet e saj.
“Ne jemi një komb që ka vuajtur shumë për shkak të sanksioneve. Ne kërkojmë të mos flasim gjuhën e sanksioneve, por të bashkëpunimit” – citohet të ketë thënë Gjuriq./FolDrejt/
