Ukrainasit po vazhdojnë të jetojnë në ankth. Madje si shkak i disa granatimeve, qytetarët po fshihen nëpër bodrume. Artileria ruse i dëmtoi rëndë 16 shtëpi në fshatin Novognativka të Ukrainës lindore. Madje gjithë kjo dhunë, sipas banorëve, po tentohet të fshihet nga Rusia.
“Kam dëgjuar që sollën çeçenë. Dhe pas kësaj, ata thonë se Rusia nuk është e përfshirë? Këtu është pozicioni i tyre, direkt këtu, 6 sekonda, nga fluturimi i një predhe,” deklaroi një banor i Novognativka.
Ikja nga vendi nuk është një zgjidhje për familjen Manha, e cila jeton në gjendje të rëndë ekonomike.
“Ndalojeni luftën. Thuajuni Zelenskyt e Putinit të ndalojnë gjithë këtë. Unë thjesht nuk mund të jetoj kështu. Ata duhet të arrijnë një marrëveshje, duke përfshirë Amerikën. Të gjithë ata që janë përgjegjës. Pasi ne po vuajmë. Ne jemi njerëz të thjeshtë. Ata thjesht mund të largohen me milionat e tyre dhe ne duhet të qëndrojmë këtu”, ka thënë Ekaterina Evseeva, 60 vjeç, banuese në Novognativka.
Edhe një shtëpi në Donetsk, e kontrolluar nga rebelët në Ukrainën lindore, u bombardua, të dielën në mbrëmje. Qindra predha artilerie shpërthyen përgjatë vijës ndarëse midis ushtarëve ukrainas dhe separatistëve të mbështetur nga Rusia, derisa mijëra njerëz u evakuuan nga zona e goditur. Zyrtarët në territoret separatiste pretenduan se forcat ukrainase filluan me sulmet e rënda gjatë ditës së kaluar dhe se dy civilë u vranë në një fshat afër kufirit rus.
