Njerëzit në Ukrainë janë në rrezik të vdesin nga të ftohtit këtë dimër për shkak të sulmeve ruse kundër furnizimeve me energji elektrike, ka thënë guvernatori i rajonit lindor të Donetsk, shkruan Sky News, transmeton Fol Drejt.
Pavlo Kyrylenko i tha Sky News se autoritetet ukrainase po bëjnë gjithçka që munden për të siguruar dru zjarri dhe soba për banorët që ende jetojnë në qytetet dhe fshatrat e vijës së parë në provincën e tij që nuk kanë energji elektrike, gaz ose ujë të rrjedhshëm në temperatura nën zero.
Por ai tha se intensiteti i bombardimeve ruse do të thotë se është shumë e vështirë të riparohet infrastruktura kritike “kështu që njerëzit kanë kohët më të këqija dhe më të vështira”.
Qendrat speciale – të njohura si “pikat e pathyeshmërisë” që ofrojnë një burim energjie elektrike dhe ngrohtësie – po ofrohen gjithashtu edhe në zonat ku ka luftime.
“Por armiku e kupton këtë… dhe armiku po qëllon dhe lëshon sulme me raketa pikërisht në këto pika ngrohjeje”, tha zoti Kyrylenko, duke folur në qytetin e Kramatorsk.
I pyetur nëse është i shqetësuar se njerëzit mund të vdesin këtë dimër për shkak të të ftohtit, guvernatori tha: “Për faktin se nuk ka ngrohje, ekziston rreziku që njerëzit të vdesin nga hipotermia”.
Por kërcënimi më i menjëhershëm është nga zjarri i artilerisë dhe raketave ruse.
Guvernatori, i veshur me rrobe ushtarake, tha se luftimet më të ashpra të luftës aktualisht janë duke u ndezur rreth qytetit Bakhmut në provincën e tij, ku forcat ruse po përpiqen të thyejnë linjat ukrainase.
Ai tha se nuk do të kenë sukses./FolDrejt/
