Bashkimi Evropian (BE), e ka shtuar presionin ndaj Kosovës. Kështu të paktën po interpretohet çështja e shtyrjes së propozimit për liberalizim vizash në Këshillin e Ministrave të BE-së, që ishte paraparë të shtrohej për diskutim në ditën e sotme, shkruan Fol Drejt.
Duket që ky vendim u mor pas “sherrit” që plasi ndërmjet Shefit për Politikë të Jashtme të BE-së Joseff Borrell me Kryeministrin Albin Kurti, pas takimit të fundit në Bruksel.
Dështimi i arritjes së një marrëveshjeje ndërmjet Kosovës dhe Serbisë për çështjen e targave, bëri që situata të mbetet kjo që vijon të mbretërojë tash e sa javë: plot tension!
Gazetarja e njohur Gjeraqina Tuhina ka reaguar me një postim në llogarinë e saj në Twitter, duke thënë se me këtë po dëshmohet se çështja e dialogut dhe liberalizimit të vizave, janë të ndërlidhura:
“Votimi për lirinë e vizave të #Kosovës është shtyrë “për shkak të zhvillimeve politike në veri”. Duke qenë se vizat janë i vetmi shkop/karotë që ka #BE, është e drejtë të thuhet se vizat dhe dialogu janë pothuajse formalisht të ndërlidhura.”
Vote on #Kosovo visa lib postponed “due to political developments in the North”. Given that visas are the only stick/carrot that #EU has it is fair to say that visas and dialogue are almost formally interconnected. https://t.co/zMztTRXmUO
— Gjeraqina Tuhina (@gjeraqina) November 23, 2022
Pas këtij vendimi të papritur ka reaguar edhe Avni Bytyqi duke e cilësuar si shantazh këtë vendim:
“BE e paska larguar nga agjenda liberalizimin e vizave për shkak të situatës në veri. Çfarë turpi, kjo vetëm sa e damton procesin e dialogut. Nga një proces teknik për vizat, BE paska kaluar në shantazh. MARRE!”
BE e paska larguar nga agjenda liberalizimin e vizave për shkak të situatës në veri. Çfarë turpi, kjo vetëm sa e damton procesin e dialogut. Nga një proces teknik për vizat, BE paska kaluar në shantazh. MARRE!
— Avni Bytyçi (@AvniBytyciKS) November 23, 2022
Për analistin Xhevdet Pozhari ky presion i BE-së, është i pakuptueshëm dhe qesharak:
“Ky presioni me viza i BE-së është qesharak. Me pak fjalë na thonë se nuk do t’ua japim diçka që nuk e keni pas kurrë dhe ju kemi gënjyer 100 herë deri më tash, aq sa pushtetarët kanë festuar edhe me shampanja.
Jo veç Albin Kurti, por edhe fëmijët në Kosovë nuk i hanë këto fore. A po doni marrëveshje finale që vet e keni propozu? Qe ku e keni kryeministrin me 50% të vullnetit qytetar në tavolinë, i gatshëm për me diskutu dhe me e arrit një marrëveshje finale.
Bindeni atë fashistin në Serbi që e ka mashtru edhe popullin e vet, edhe veten, edhe juve se gjoja ka vullnet për paqe.
Pra, bindeni një kriminel që deklaronte se për çdo serb të vrarë do të vrasim 100 myslimanë!”
Në anën tjetër Kryeministri Kurti gjatë një konference për shtyp sot tha se i tërë procesi i dialogut ishte paraparë që të përfundojë më 23 mars, por “ata hoqën dorë!” – tha ai, duke aluduar në BE-në, përkatësisht Joseff Borrellin, si ndërmjetësues.
Duke folur për raportet e krijuara me Borrellin, Kurti u shpreh:
“Atë e kanë zgjedh vendet anëtare të BE-së. Ata e vlerësojnë performancën e tij, unë në takime me të ja kaloj jashtëzakonisht mirë, unë mund të mos pajtohem me të, por kjo nuk është e reja. E reja është që s’po pajtohet me propozimin e BE-së. Nuk është hera e parë që ai nuk pajtohet me mua”, tha Kurti.
Për animin e hapur të BE-së ndaj Vuçiqit së fundi kanë folur edhe intelektualët malazezë. Në një reagim të tyrin për të cilin po flasin mediat malaziase, ata kanë theksuar se me veprimet e fundit BE dhe ShBA-të, po i ndihmojnë hapur politikës ruse:
“Shtetet e Bashkuara të Amerikës dhe Bashkimi Evropian me ose pa vetëdije po e ndihmojnë politikën ruse në rajon. Pse e bëjnë këtë është e vështirë të thuhet. Por nëse si ilustrim të situatës në Ballkanin Perëndimor do të merrnim deklaratat e ambasadorit amerikan në Beograd, Christopher Hill dhe përfaqësuesit të lartë të BE-së për politikë të jashtme dhe siguri, Josep Borrell, për Kosovën, atëherë mund të konstatojmë se Perëndimi po ia mban anën Aleksandar Vuçiqit. Pse e bëjnë këtë – ne nuk e dimë.”
Në mediat serbe, ndërkaq, Kryeministri Kurti po vijon të kualifikohet si i vetmi fajtor, dhe i vetmi faktor që po e pengon përparimin e procesit. Megjithatë Kryeministri sot hodhi posht pretendimet se Kosova nuk u tregua palë konstruktive në bisedime, duke thënë se Serbisë iu ofruan 8 opsione për çshtjen e targave, të cilat i refuzoi që të gjitha.
“Unë do t’i informoj shtetet anëtare të BE-së, partnerët, për sjelljen e palëve dhe mosrespektimin e detyrimit ligjor ndërkombëtar. Kjo vlen veçanërisht për Kosovën”, tha kryediplomati evropian Josep Borrel – të hënën pas takimit maratonik me Kurtin e Vuçiqin. Dhe sot pas largimit nga agjenda të çështjes së liberalizimit në takimin e ministrave të jashtëm të BE-së, duket që Borrell vërtetë e ka çuar mesazhin në vend./FolDrejt/
