Në njëzet vjetorin e fillimit të bombardimeve të NATO-s kundër Serbisë, kryeministri i Kosovës, Ramush Haradinaj, ka kryer një intervistë për median gjermane Stuttgarter Nachrichten, ku ka folur për idenë e shkëmbimit të territoreve dhe marrëdhëniet e Prishtinës me Brukselin dhe Uashingtonin, përcjell foldrejt.com.
“Atëkohë Kosova ishte e shkatërruar tërësisht, kurse sot nuk është lehtë që të aktivizohet potenciali i vendit tonë. Ka shpresë, por ka edhe sfida,” tha fillimisht Haradinaj duke bërë krahasim mes 1999 dhe 2019. “Dikur Uashingtoni, Brukseli dhe Berlini ishin të bashkuar mbi Ballkanin, sot fatkeqësisht nuk ka partnerë të tillë të bashkuar.”
Në lidhje me tarifën 100 përqind për mallrat serbe dhe boshnjake dhe presioneve të SHBA, Haradinaj shtoi se “ka respekt për SHBA, por ne jemi shtet i pavarur dhe vendimet i marrim vetë. Kjo është realitet.”
Për vijimin e dialogut Haradinaj ka akuzuar edhe Frederica Mogherinin, e cila ka çuar në rrugë të gabuar dialogun. Dihet se Mogherini është mbështetëse e korrigjimit të kufijve, diçka që e kundërshton ashpër kryeministri i Kosovës.
“Asnjë kufi nuk është stabil mbi Ballkanin. Çështja e kufijve nuk do destabilizonte vetëm Kosovën, por gjithë rajonin. Ne jemi për një marrëveshje paqësore me Serbinë, por ne nuk do rrezikojmë territore dhe kufi. Është e rrezikshme – dhe ne nuk do vijmë deri aty,” tha në fund ai, përcjell foldrejt.com.
