Njëri ndër albanologët më të shquar të historisë shqiptare, Franc Baron Nopca, i cili treçerekshekulli ia ka kushtuar jetën vizitave dhe studimeve të Shqipërisë, kryesisht të veriut, flet në një rast për një hekurudhë që do lidhte Malin e Zi me Shqipërinë e mesme për të vijuar më pas drejt Manastirit dhe pjesës tjetër të botës, informon foldrejt.com. Kjo hekurudhë do ndërtohej me koncesion nga Austro-Hungaria, kohë kur Sulltani Abdulhamid 2 kishte marrë përpjeke për të ndërtuar sa më shumë hekurudha. Ky projekt parashihej në 1905, pak kohë përpara se të shkatërrohej përfundimisht Perandoria Osmane.
Në librin me kujtime të tij, Udhëtime nëpër Ballkan, Nopca më konkretisht kujton:
“Përveç trajtesave shkencore u mora dhe me çështje të tjera në lidhje me Shqipërinë, meqënse asokohe diskutoheshin edhe përgjigja për konçesionin e hekurudhës së Sanxhakut edhe ajo për ndërtimin e hekurudhës së Luginës së Drinit dhe unë u lidha me shefin e seksionit Riedel, i cili erdhi për ndërtimin e një hekurudhe nga Kotorri për në Dibër. Në lidhje me hekurudhën e Sanxhakut unë propozova ndërtimin e një hekurudhe, e cila kalonte nga Ferizaj nëpër Spas dhe Orosh dhe më pas nëpër Ndënfadina si dhe një tjetër që shkonte nga Kotorri nëpër Ndënfadina drejt Dibrës. Botova në Österreichen Rundschau, patjetër anonim, një artikull në lidhje me këtë”.
Hekurudha nuk u ndërtua. 120 vjet më pas nuk është ndërtuar as Rruga e Arbrit./Foldrejt.com
