Përfaqësuesit në Parlamentin e Turqisë nesër dot të nisin diskutimin për hyrjen e Finlandës në NATO, e cila do të jetë pengesa e fundit për hyrjen e këtij vendi në aleancën ushtarako-politike, raporton Klix, përcjell Fol Drejt.
Sipas mediave turke, Yilmaz Tunc, nënkryetar i klubit të përfaqësuesve të partisë në pushtet AK, tha se vendimi për miratimin e hyrjes së Finlandës në NATO do të jetë në rendin e ditës të seancës së planifikuar për të enjten.
“Projektligji, i cili parashikon miratimin e protokollit për anëtarësimin e Finlandës në NATO, është miratuar nga Komisioni i Punëve të Jashtme më 23 mars”.
Vendimi i Turqisë vjen vetëm dy ditë pasi edhe Parlamenti i Hungarisë miratoi një vendim që pranonte hyrjen e Finlandës në NATO. Ndryshe nga anëtarët e tjerë të NATO-s, të cilët protokolluan çështjen e pranimit të Finlandës që në vitin 2022, Turqia dhe Hungaria e shtynë diskutimin për këtë çështje deri në këtë javë.
Nëse edhe Turqia miraton hyrjen e Finlandës në NATO, këtij vendi i kanë mbetur edhe disa hapa rutinë përpara se të anëtarësohet në aleancë. Sekretari i Përgjithshëm i NATO-s do t’i dërgojë Finlandës një ftesë zyrtare për anëtarësim dhe pas nënshkrimit të protokolleve të anëtarësimit, letra do të depozitohet në Shtetet e Bashkuara të Amerikës, pas së cilës Finlanda do të bëhet anëtare e plotë e NATO-s.
Edhe pse Finlanda dhe Suedia duhej të hynin në aleancë si paketë, Suedia do të presë këtë vendim, duke qenë se Hungaria, por edhe Turqia, nuk tregojnë vullnet të mirë për të miratuar anëtarësimin e këtij vendi në Aleancë. /FolDrejt/
