Zgjidhja e çështjeve teknike në politikë nuk është për njerëzit që duan zgjidhje të shpejta, ka thënë ambasadori amerikan në Beograd, Christopher Hill, në një intervistë për Dnevnik Nova. Në këtë intervistë, ambasadori Hill është pyetur edhe për artikullin e famshëm që New York Times e publikoi, ndërsa nëpërmjet tij nxirrte në pah portretin kriminal të Aleksandër Vuçiqit, transmeton Fol Drejt.
Ai e vlerësoi dialogun ndërmjet Beogradit dhe Prishtinës si një proces shumë të vështirë dhe se të gjithë e kuptojnë se situata është e komplikuar, por gjithashtu tregoi se në anën tjetër është e nevojshme formimi i Asociacionit të Komunave Serbe.
“Ka një vetëdije në mesin e politikëbërësve amerikanë se serbët në Mitrovicën e Veriut dhe Kosovën, në realitet, duhet ta kenë këtë çështje të zgjidhet përmes Bashkimit të Komunave Serbe”, tha Hill.
“Është një çështje me të cilën po merren edhe evropianët edhe SHBA-të dhe ndonëse nuk do të ketë përparim në çdo takim, në fund do të kemi një Bashkim të Komunave Serbe”, tha diplomati amerikan.
Ai pajtohet me vlerësimin e shefit të diplomacisë evropiane, Josep Borrel, në vlerësimin negativ për zgjedhjet e fundit të mbajtura në veri, të cilat u mbajtën me bojkotimin e shumicës së serbëve në këto komuna – kur është fjala për përmirësimin e marrëdhënieve në mes të Beogradit dhe Prishtinës.
“Nuk besoj se këto zgjedhje mund të kenë një ndikim afatgjatë pozitiv në komunat me shumicë serbe dhe është e rëndësishme për mua që të fokusohemi dhe ta tejkalojmë atë dhe të arrijmë në Komunitetin e Komunave me shumicë serbe”, tha Hill.
“Kur ke çështje teknike në politikë, nuk është për njerëzit që duan zgjidhje të shpejta. Duhet kohë për t’i zgjidhur ato. Dallimet janë të thella dhe është koha që njerëzit të fillojnë të dëgjojnë njëri-tjetrin më mirë për të gjetur një zgjidhje”, theksoi ai.
Ai gjithashtu iu përgjigj pyetjes për të komentuar pretendimin e fundit të Presidentit Vuçiq se artikulli në New York Times për lidhjet e supozuara të presidentit serb me strukturat kriminale dhe klanin mafioz Belivuk ishte në fakt një përpjekje e CIA-s për ta disiplinuar atë për Kosovën.
Hill, duke e bindur veten nga respektimi i presidentit serb, megjithatë pranoi: “CIA nuk ka asnjë përgjegjësi për të ndihmuar New York Times të shkruajë artikuj dhe unë nuk besoj se kjo është e drejtë për CIA”./FolDrejt/
