Tashmë është zyrtare. Filan Mitrev (25), djali i njërit prej doktorëve më të famshëm të Ballkanit, Zhan Mitrev, është i akuzuar për terrorizëm nga Prokuroria gjermane. Ai mendohet se ka dashur të sulmojë një restorant në Frankfurt, për të “vrarë sa më shumë pabesimtarë”, ndërsa ka qenë i impresionuar nga “lufta e paepur e ISIS kundër të gjithë botës”.
Si ka ardhur deri te radikalizimi i Filanit, nuk është se dihet saktë, por ajo që dihet është se Filan Mitrev ka pasur probleme me ligjin edhe përpara se të akuzohej për terrorizëm. “Një hajdut, por që kishte gjithçka në fëmijëri”, do shkruante media gjermane Frankfurter Rundschau (fr.de) në 21 shkurt 2017 për Filan Mitrevin. Atëkohë nuk kishte lidhje me ISIS.
Prej 12 tetor 2016 ai qëndroi në burg për grabitje me thikë. Ai me kërcënimin e thikës kishte dhunuar disa punonjës për ti marrë 10 euro, kurse shpesh kishte hëngër kifle 3-5 euro papaguar në kasë, përkundër që ishte biri i njërit prej njerëzve më të pasur të vendit të origjinës. Grabitje me kërcënim, ka ardhur nga pirja e drogës, por edhe vetë gjykatësit gjermanë ishin çuditur se pse ai kishte kërkuar shpesh vetëm 10 euro gjatë grabitjes!
Vetë Filani i kishte pranuar akuzat dhe tha se ishte penduar për atë që kishte ndodhur. “Thjesht isha i varur nga droga. Pa para nuk mund të mbijetohet,” do thoshte ai përpara gjykatës. Ishte 21 vjeç, kurse pas rreth tre vitesh ai do radikalizohej, përcjell foldrejt.com.
Itinerari i një radikali
Filan Mitrev në moshën 13 vjeçare fillon drogën. Prej në këtë moshë fillojnë problemet në karrierën e tij si nxënës.
Fillon të ndryshojë shpesh shkollat dhe internatet. Babai mundohet të financojë një shkollë Kung-Fu në Kinë, me shpresë që do gjejë rrugën e drejtë djali, por më kot. Filan M. me hundën përpjetë nuk mund të përshtatej.
Në moshën 21 vjeçare dënohet me 2.5 vjet burg për vjedhje dhe kërcënim.
Pas daljes nga burgu, ai shfaqet i penduar. Në moshën 23 vjeçare ai pranon se ka pasur një fëmijëri me fat dhe se “kurrë nuk është rrahur”, por thjesht ka dashur t’u tregojë prindërve se “dëshiron të gjejë vetë rrugën e drejtë”.
Por pas rreth një viti, ai dënohet për terrorizëm dhe tashmë jeta e tij vërtet mund të jetë përgjithmonë përballë Gjykatave./Foldrejt.com
