Deputeti nga radhët e Lidhjes Demokratike të Kosovës dhe njëherit ish-kryeministri, Avdullah Hoti, ka reaguar në lidhje me gjendjen ekonomike, duke vlerësuar se qytetarët po bartin pasojat e inflacionit prej 12%, transmeton Fol Drejt.
Hoti, me anë të një postimi në facebook, ka numëruar disa prej produkteve në të cilat inflacioni ka shënuar rritje.
“Inflacioni mesatar në dhjetor 2022 arriti në 12%, por për disa mallra dhe shërbime elementare, ku shpenzohet shumica e buxhetit familjar, arriti në:
– 47% për shpenzime të transportit;
– 39% për lëndë djegëse;
– 31% për vajra dhe yndyra;
– 28% për qumësht; djathë e vezë;
– 21% për bukë e drithëra;
– 20% për mish;
– 18% për sheqer etj”, ka shkruar Hoti.
“Çfarë bënë vendet e tjera për të ulur barrën për qytetarë?
– disa i rritën pagat për normën e inflacionit,
– disa i ulën ngarkesat tatimore,
– disa i ndihmuan qytetarët pa përjashtim në përballimin e kostos së jetesës,
– në veçanti subvencionuan çmimin e gazit dhe naftës, çmimet e të cilave u rritën më së shumti dhe ndikuan në rritjen e të gjitha çmimeve të tjera.
Ndërkaq, në Kosovë masa substanciale nuk shihen askund, me përjashtim të shtesave në pensione dhe asistencë që janë të përkohshme. Tatimi në Vlerën e Shtuar (TVSH) dhe akciza nuk u ulën, jo se nuk ishte e përballueshme për buxhetin, por për shkak se ishte propozuar opozita (nga LDK-ja). Si rezultat i inflacionit, shteti inkasoi shumë më tepër të hyra, të cilat nuk i shpenzoi dhe, si rezultat, ato u zhvlerësuan së paku për 12%”, ka shtuar ai tutje.
Hoti tutje ka vlerësuar se sikur të uleshin ngarkesat tatimore dhe akciza në naftë, atëherë efektet do t’i ndienin të gjithë pa përjashtim.
“Nuk do të kishte pasur nevojë për këtë ligj diskriminues. Nuk do të ishin mbledhur mjete pa nevojë në buxhet, të cilat po zhvlerësohen”, ka shtuar Hoti tutje./FolDrejt/
