Ambasadori amerikan në Kosovë, Jeffrey Hovenier, e ka uruar 14-vjetorin e pavarësisë së Kosovës, duke thënë se kjo çka është arritur gjatë kësaj kohe është një mrekulli.
“Kosova sot feston 14 vjet pavarësi – 14 vjet si vend sovran dhe si partnere e besueshme e Shteteve të Bashkuara të Amerikës. Të arriturat e Kosovës përgjatë 14 viteve të shkurta nuk janë asgjë më pak se mrekulli – demokraci e gjallë, ekonomi e aftë, si dhe lidership që Kosova e përçon përtej kufijve të saj”.
Madje, ai ka thënë se ShBA-ja është krenare që e quan Kosovën partnere dhe mike. Hovenier tha se partnerët i ndihmojnë njëri-tjetrit, duke përmendur vaksinat që shteti i tij ia ka dhënë Kosovës në luftën me pandeminë.
“Partnerët i ndihmojnë njëri-tjetrit. Për këtë arsye ishim aq të lumtur që javën e shkuar patëm mundësinë të ndajmë edhe gjysmë milioni të dozave të sigurta, efektive në luftën tonë të përbashkët kundër Covid-19. Gjithsej, populli amerikan i ka dhuruar më shumë se një milion doza të vaksinave dhe pothuajse 10 milionë dollarë ndihmë për t’ju mbajtur juve dhe familjet tuaja të shëndetshëm dhe të sigurt”.
Ambasadori i shtetit më të fuqishëm është zotuar se do të vazhdojë partneriteti amerikano-kosovar, njofton Klankosova.tv.
“Përderisa e festojmë bashkërisht këtë ditë të shënuar, ju premtoj se partneriteti i qëndrueshëm që e gëzojmë në mes të dy vendeve tona – Kosovës dhe Shteteve të Bashkuara të Amerikës – do të vazhdojë vetëm të rritet në vitet e ardhshme. Si do ta bëjmë këtë? Së bashku!”.
Hovenier në letrën e urimit për 14 vjetorin e Pavarësisë e ka përmendur edhe dialogun me Serbinë duke thënë se i njëjti duhet të përfundojë me marrëveshje me njohje të ndërsjellë e cila s’e cenon sovranitetin e Kosovës.
“Së pari, duke e mbështetur përparimin në dialogun e lehtësuar nga BE-ja. Dëshirojmë të shohim Kosovën plotësisht të angazhuar në rajon dhe të integruar në institucionet evropiane dhe euroatlantike. Kjo do të thotë arritje të marrëveshjes gjithëpërfshirëse me Serbisë të përqendruar në njohjen e ndërsjellë PA sakrifikuar sovranitetin e Kosovës, integritetin e saj territorial apo shkelur Kushtetutën e saj”.
Ambasadori amerikan është zotuar edhe për mbështetje të mëtutjeshme për zhvillimin e FSK-së, forcimin e institucioneve të pavarura të sundimit të ligjit dhe ndërtimin e ekonomisë së qëndrueshme, njofton Klankosova.tv.
“Gjithashtu, nënkupton vazhdimin e mbështetjes së zhvillimit të Forcës së Sigurisë së Kosovës në forcë shumetnike, forcë tokësore mbrojtëse të ndërveprueshme me NATO-n, e cila jo vetëm që është e aftë për të mbrojtur kufijtë e Kosovës, por që gjithashtu, ashtu siç tashmë e ka demonstruar, kontribuon në misionet e përbashkëta të sigurisë globale dhe mbështet reagim efikas ndaj fatkeqësive natyrore”.
“Së dyti, duke mbështetur përpjekjet drejt qeverisjes së mirë dhe duke forcuar edhe më tej institucionet e pavarura të sundimit të ligjit, ne dëshirojmë ta ndihmojmë Kosovën përderisa vazhdon të ndërtojë institucione publike të qëndrueshme, efikase që ofrojnë shërbime dhe ndajnë drejtësi në mënyrë të drejtë për të gjithë qytetarët përderisa njëkohësisht çrrënjosin korrupsionin”.
“Së treti dhe në fund, do të vazhdojmë t’ju ndihmojmë përderisa ndërtoni ekonomi të qëndrueshme dhe dinamike. Një ekonomi që i jep përparësi diversifikimit të burimeve të energjisë dhe që ka furnizim të sigurt dhe të qëndrueshëm me energji elektrike; që krenohet me një sektor të fortë privat; tërheq investime të huaja të drejtpërdrejta; mbron mjedisin; dhe ruan talentin inovativ”.
Ambasadori Hovenier këtë urim e mbyll duke thënë se mirëpresin mundësitë për të mbështetur Kosovën përderisa i shfrytëzon mundësitë që i ka përpara.
“Pra, sot, qëndrojmë përkrah Kosovës për të festuar me ju. Ju urojmë për të gjitha të arriturat dhe mirëpresim mundësitë për t’ju mbështetur përderisa i shfrytëzoni mundësitë që i keni përpara. Urime Dita e Pavarësisë, Kosovë!”.
