Hungaria planifikon të dërgojë një delegacion në Suedi dhe Finlandë për të zgjidhur “mosmarrëveshjet politike” që kanë ngritur dyshime midis disa ligjvënësve hungarezë nëse do të mbështesin aplikimet e dy vendeve nordike për t’u bashkuar me NATO-n, ka thënë një ligjvënës i lartë hungarez, raporton Al Jazeera, përcjell Fol Drejt.
Mate Kocsis, kreu i grupit parlamentar të partisë nacionaliste Fidesz, tha gjatë një konference për shtyp se një “debat serioz” ishte shfaqur brenda grupit parlamentar mbi pranimin në NATO të Suedisë dhe Finlandës, sipas agjencisë shtetërore të lajmeve MTI.
Disa ligjvënës të partisë në pushtet, tha ai, u zemëruan se “politikanët nga këto vende kanë fyer Hungarinë në një mënyrë të vrazhdë, të pabazë dhe shpesh vulgare në vitet e fundit, dhe tani ata po kërkojnë një favor”.
Një delegacion parlamentar do të udhëtojë në Suedi dhe Finlandë për të kërkuar të qartësojë pozicionet e tyre, tha Kocsis. Udhëtimi nuk pritej të vononte debatin e parlamentit hungarez, i caktuar për të filluar javën e ardhshme, për ratifikimin e aplikimeve të NATO-s, tha ai.
Hungaria është i vetmi vend anëtar i NATO-s, përveç Turqisë, që nuk ka miratuar ende aplikimin e Suedisë dhe Finlandës për t’u bashkuar me aleancën ushtarake perëndimore. /FolDrejt/
