Deputeti i PS, Alket Hyseni i ka uruar ditëlindjen në ditën e Shën Valentinit, poetit të mirënjohur shqiptar Lefter Çipës i cili sot mbush plot 79 vjeç.
Hyseni shkruan se Çipa është mbrojtës i pashoq i traditës së rrallë dhe patriot i madh i shqiptarisë, simbol i atdhedashurisë dhe burim frymëzimi e krenarie. Deputeti e konsideron Çipës At të shenjtë dhe fisnik tradite, teksa shton se froni i nderit të tij është skalitur prej kohësh.
Urimi i Hysenit është që Çipa të rrojë sa polifonia shqiptare, dhe këngët të bëhen mal e malet këngë.
STATUSI NGA ALKET HYSENI
I dashuri i përjetshëm i isopolifonisë s’mund të lindte ditë tjetër, veç 14 Shkurtit.
Nga “Porta e borës”, apo “Ballkoni i bregut”, Piluri, në një shtëpi fisnike guri me dritaret e vogla që shohin detin, por me ngrohtësi familjare e shpirt të madh patriotik, atje ku era dhe mali prej miliona vitesh ndeshen pa pasur fitues apo humbës, në vendin e ashpër të shqiponjave e të burrave të rreptë të Akrokerauneve, do lindte ai që sot është padiskutim “Princi i polifonisë shqiptare”, Lefter Çipa.
Rreth 1300 këngë e vjershërime, themelues dhe drejtues i grupit më melodioz të këngës polifonike “Bejkë e bardhë”, pjesmarrës me penën e tij magjike sa askush tjetër në Festivalet Folklorike Kombëtare, studiues e kritik i pashoq i gurrës sonë të pashtershme popullore, botues i 20 librave me poezi, virtuoz i shkrirjes së dyjares, fyellit me kengën piluriote.
