Duke marr shkak arrestimin e Milun Milenkovic Lunet në veri të Kosovës, i cili u identifikuar nga autoritetet e Kosovës si pjesëtar i një grupi kriminal dhe i dyshuar për sulmet e fundit ndaj pjesëtarëve të KFOR-it, Vuçiq, duke iu drejtuar publikut të dielën më 18 qershor i quajti kriminelë Kryeministrin Albin Kurti dhe Ministrin e Punëve të Brendshme Xhelal Sveçla, shkruan Fol Drejt.
Në një moment, Vuçiq ia kujtoi opinionit serb se Kurti dhe Sveçla e kanë cilësuar Lunetin kriminel.
“Kriminel je ti babo! Edhe ti Kurti dhe ti Sveçla. Turp të keni!”, u tha Vuçiq.
Jovana Gligorijeviq, gazetare e Vremenit, thotë për Danas se deklarata e presidentit serb, ka qenë momenti kur ajo ka fikur televizorin dhe ka pushuar së dëgjuari fjalimin e Vuçiqit.
“Unë vetë, si të gjithë, prirem të shprehem natyrshëm, por shprehja “ti je kriminel babo” thuhet në një mënyrë unike nga presidenti i vendit, edhe atë në një moment shumë të vështirë dhe të rëndë. Përveç gjithçkaje që na rregullon çdo ditë, Vuçiq tani po demonstron sjellje infantile, në një kohë kur na duhet një qasje e pjekur, serioze ndaj gjërave. Derisa po i përgjigjem pyetjes suaj, po udhëtoj drejt vijës administrative me Kosovën, nuk e di nëse do të na lënë ta kalojmë, por nëse ka ndonjë pengësë, ndoshta do t’i thërrasim “ju jeni kriminelë”, dhe pastaj do të na lënë të shkojmë.”
Sipas Dragan Popoviqit, drejtor i Qendrës për Politikë Praktike, Aleksandar Vuçiq po përpiqet të dramatizojë më tej situatën tashmë të komplikuar në Kosovë.
“Falë lëvizjeve të tij, por edhe të papërgjegjshme dhe të pamenduara nga Qeveria e Kurtit, atij iu dha mundësia të nxisë frikë dhe pasiguri te njerëzit sipas zakonit të mirë e të vjetër. Njerëzit e frikësuar, të shqetësuar për sigurinë e tyre dhe të familjeve të tyre, janë rezervuari ideal i votave për çdo autokrat, përfshirë Vuçiqin” – thotë Popoviq.
Mesazhet infantile si “ti je kriminel”, shton ai, duhet të përforcojnë përshtypjen se situata është e jashtëzakonshme dhe se presidenti kujdeset për qytetarët e tij, edhe më shumë se në një situatë të rregullt.
”Bëhet fjalë për aktrim dhe atë aktrim të lodhtë për të cilin Vuçiq, normalisht, është i prirur, vetëm se tani aksionet janë shumë më të larta. Rritja e tensioneve në opinion në një situatë të tillë mund të jetë shumë e rrezikshme për njerëzit që jetojnë në Kosovë, por edhe në zonat kufitare të Serbisë” – ka thënë ai./FolDrejt/
