Lufta e Izraelit kundër Hamasit e ka afektuar edhe opinionin publik kosovar. Ndonëse vend i vogël, mediat vendore janë duke i përcjellë me vëmendje zhvillimet atje. Ndonëse, sipas një pjese të mirë të opinionit, paanshmëria në këtë mjedis informativ, vështirë mund të identifikohet, shkruan Fol Drejt.
Gazetari dhe shkrimtari Imer Topanica e ka shtruar pikërisht këtë dilemë. Duke iu referuar një fragmenti të një interviste të Jeta Xharrës me Augustin Palokajn, ai thotë se gazetaria e pavarur, është vënë në pikëpyetje, sidomos në rastin e Palestinës.
“Sot mjedisi informativ nuk ofron një model të një gazetarie të pavarur. Një gazetari e tillë është utopi. Shkurt, media të pavarura nuk ka, por ka ndër to më të pavarura, e sidomos ka gazetarë të pavarur. E në anën tjetër, për fat të keq, ka varitete mediash të varura me bollëk. Gjithsesi duhet bërë një analizë më e detajuar për të nxjerr konkluzione më precize, por zonja, pavetëdijshëm, po tregon që është “e bombarduar nga ambasada e Izraelit”, e cila, do ta imponojë narracionin zyrtar të shtetit që përfaqëson. A s’vdes paanshmëria në këtu?” – ka shkruar Topanica në murin e tij në Facebook.
Ai i është referuar një fjalie në intervistën e Xharrës me Palokajn. Xharra ndër të tjera thotë:
“Që kur ka ndodhur Gaza, neve gazetarëve, që kur ka ndodhur sulmi nga Hamasi, gazetarët si ne jemi të bombarduar nga ambasada e Izraelit me informata për narrativen e Izraelit që don me e dhanë për Kosovën, këto informata unë i marr shqip, marr imella të përditshëm…”
Fragmenti i shkëputur nga intervista e saj me Palokajn, është komentuar e shpërndarë nga shumë qytetarë./FolDrejt/
