Zeqirija Ibrahimi ka kujtuar kohën e studimeve dhe një peng i cili i kishte mbetur nga ajo periudhë, në lëndën e Letërsisë Botërore.
Siç rrëfeu ai vetë, në vitin akademik 1997/98 në program parashiheshin të lexoheshin rreth 60 vepra letrare. Të gjitha, sipas tij, nuk ia kishte dalë t’i përfundonte, në mesin e tyre edhe “Vdekjen në Venecia” të Tomas Manit:
“Në vitin akademik 1997/98 isha student i vitit të tretë të filologjisë në Katedrën e Albanologjisë në Shkup. Atë vit e kishim edhe lëndën Letërsia botërore, që e mbante profesoresha, tashmë e ndjerë, Jadranka Vlladova. Në sistemin e vjetër, për provimin e kësaj lënde kërkohej të lexoheshin rreth 60 vepra letrare. Dëshira ime ishte t’i lexoja të gjitha, por – përkundër përpjekjeve – deri në afatin e dytë (në shtator 1998) nuk arrita ta përfundoj listën e plotë.
Më mbetëm diku më pak se 10 vepra, mes tyre edhe “Смрт во Венеција” (“Vdekje në Venecie” – atëherë nuk ekzistonte në gjuhën shqipe) nga Tomas Man (1875-1955). Që mos ta filloj vitin e katërt pa e pastruar të tretin, vendosa të hyj në provim duke rrezikuar. Për fat, nuk më ranë pyetje për veprat që nuk i kisha lexuar dhe provimin e kalova me notë të shkëlqyeshme.
Megjithatë, çdoherë e kam ndjerë se ka qenë notë disi e pamerituar, andaj ia kisha bërë vetes detyrë që atëherë që ato vepra do i lexoj më vonë. Prandaj, gjatë viteve, sa herë që kam pasur mundësi “të vjedh” nga koha ime, jam munduar ta plotësoj atë detyrim. Në këtë frymë ishte edhe leximi i sotëm i veprës “Смрт во Венеција” (e botuar për herë të parë gjermanisht më 1912), që e bleva në panairin e fundit të librit në Shkup.
Ndonëse prof. Jadranka Vlladova ka ndërruar jetë qysh në vitin 2004, duke u lutur për shpirtin e saj, do të doja t’i them se vazhdoj ta plotësoj notën që ma ka dhënë.
E duke hulumtuar sot, e pashë se kjo vepër qenka botuar edhe në gjuhën shqipe më 2018.”/FolDrejt/
