Zeqirija Ibrahimi nga Instituti i Trashëgimisë Shpirtërore e Kulturore të Shqiptarëve në Shkup, ka bërë thirrje që të kihet më shumë kujdes në ruajtjen e kujtesës kolektive, shkruan Fol Drejt.
Në një reagim në llogarinë e tij në Facebook, Ibrahimi ka thënë se “është e vërtetë se pllaka e gjetur afër lokalitetit arkeologjik Scupi, ku qëndron edhe emri Dardanius, është me rëndësi dhe ajo duhet ruajtur si sytë e ballit, por më e vërtetë se kaq është se ne shqiptarët në Maqedoninë e Veriut jemi duke e rrënuar edhe historinë tonë më të re.”
Ai ka konstatuar se vetëvrasja e së kaluarës sonë është më e tmerrshme se ajo që ndodhë sot në Scupi.
Ky është reagimi i tij i plotë:
Është e vërtetë se pllaka e gjetur afër lokalitetit arkeologjik Scupi, ku qëndron edhe emri Dardanius, është me rëndësi dhe ajo duhet ruajtur si sytë e ballit, por më e vërtetë se kaq është se ne shqiptarët në Maqedoninë e Veriut jemi duke e rrënuar edhe historinë tonë më të re. Vetëvrasja e së kaluarës sonë është më e tmerrshme se ajo që ndodhë sot në Scupi.
Cili shqiptar te ne e shtrin gjenealogjinë e familjes së tij më shumë 150-170 vjet? A nuk kemi ne gjithandej shqiptarë që mburren se janë të Matit, të Lumës, të Dibrës e të Shkodrës, duke e përdëftuar tezën e MANU-t se shqiptarët janë të ardhur këtu në shekujt e fundit të sundimit osman?! Në vend se të dëshmojnë se jemi në këto troje që nga lashtësia dardane e mesjetare, ne turremi të gjejmë se “nga kemi ardhur” dhe jemi të lumtur kur “e zbulojmë”.
Përveç kësaj, gati në të gjithë fshatrat tanë i kemi rrënuar varret e krishtera, janë rrënuar kishat dhe kanë mbetur vetëm mikrotoponimet si relikte (si “Te Kisha”, “Te Krsti”, “Gur’i Kishës” etj.). Bile, edhe aty ku ka mbetur ndonjë kishë, ne ua kemi falur sllavëve dhe e kemi shpallur “të huaj për ne”.
Madje, për të dëshmuar nihilizmin tonë, nuk i kemi rrënuar vetëm kishat e gjurmët tona të krishtera, por sot nëpër shumë fshatra tanë, shpesh edhe me leje dhe mbështetje të institucionit fetar islam, rrënohen edhe xhamitë e vjetra dhe mbi ato themele ndërtohen xhami të reja. Më vetëvrasje se kjo nuk ka ku shkon.
Prandaj, është shumë mirë që duam t’u dalim zot dardanëve dhe kemi prirje të dëshmojmë lidhje me atë fis ilir, që është një detyrë mjaft e vështirë dhe gjithsesi e mirë, por po aq e rëndësishme është të mos i rrënojmë gjurmët tona të krishtera dhe, së fundi, ato të hershme myslimane./FolDrejt/
