Glauk Konjufca, kryetar i Kuvendit të Republikës së Kosovës, ka pritur sot në takim presidentin e Republikës së Shqipërisë, Bajram Begaj, transmeton Fol Drejt.
“Kosova dhe Shqipëria ndajnë organikisht dhe në mënyrë natyrale të njëjtat vlera. Prandaj është e domosdoshme të vazhdojmë t’i koordinojmë dhe bashkërendojmë sa më mirë hapat për të ecur përpara si një komb në rrugën e përparimit dhe zhvillimit të përbashkët”, u shpreh Konjufca pas takimit.
Ai tha se interesi ynë parësor mbetet integrimi euroatlantik.
“Shtetet tona po ashtu me vendosmëri e kanë dëshmuar dhe po e dëshmojnë çdo ditë e më bindshëm veten në anën e mbarë të historisë, të së drejtës dhe demokracisë. Interes yni parësor, vullnet, vizion dhe orientim i qartë deri në pikëmbërritje mbetet integrimi euroatlantik dhe askush nuk mund t’i zhvendosë shqiptarët nga kjo rrugë”.
Ky është postimi i tij i plotë:
Sot kisha nderin dhe kënaqësinë e veçantë ta mirëpres në një takim të përzemërt e vëllazëror Presidentin e sapozgjedhur të Republikës së Shqipërisë, z.Bajram Begaj.
Presidentin Begaj e falënderova që në vizitën e tij të parë zyrtare jashtë vendit ka zgjedhur pikërisht Kosovën dhe e urova për detyrën e re, duke i dëshiruar suksese në angazhimet dhe punët shtetërore që e presin.
Kosova dhe Shqipëria ndajnë organikisht dhe në mënyrë natyrale të njëjtat vlera. Prandaj është e domosdoshme të vazhdojmë t’i koordinojmë dhe bashkërendojmë sa më mirë hapat për të ecur përpara si një komb në rrugën e përparimit dhe zhvillimit të përbashkët.
Shtetet tona po ashtu me vendosmëri e kanë dëshmuar dhe po e dëshmojnë çdo ditë e më bindshëm veten në anën e mbarë të historisë, të së drejtës dhe demokracisë. Interes yni parësor, vullnet, vizion dhe orientim i qartë deri në pikëmbërritje mbetet integrimi euroatlantik dhe askush nuk mund t’i zhvendosë shqiptarët nga kjo rrugë.
Vizita e presidentit Begaj në Kosovë është pa dyshim konfirmim i lidhjes sonë të veçantë dhe bashkëpunimit unik vëllazëror, mbështetur gjithnjë në parimin një komb, një qëndrim.
