Ish-diplomati dhe zyrtari shumëvjeçar i Departamentit të Shtetit, Daniel Fried, ka thënë për Zërin e Amerikës se kriza në Kosovë është shkaktuar nga gabimet e qeverisë së Kosovës, duke thënë se atij i duket se kriza aktuale ka shkaktuar zemërimin e Shteteve të Bashkuara, përcjell Fol Drejt.
“Marrëdhëniet ndërmjet Serbisë dhe Kosovës nuk kanë qenë normale për shumë vite dhe përgjegjësia për këtë është në thelb e Serbisë, sepse ajo refuzon ta njohë Kosovën si shtet të pavarur”. “Ata nuk do ta kthejnë Kosovën – pjesërisht për shkak të viteve të nacionalizmit destruktiv serb dhe represionit në Kosovë, që çoi në ndërhyrjen e NATO-s, të cilën ne nuk e donim,” tha Fried.
Ai tha se ishte duke lexuar transkriptin e konferencës për shtyp të ambasadorit të ShBA-së në Kosovë, Jeffrey Hovenier dhe se nuk i kujtohej se që nga pavarësia e Kosovës në vitin 2008, një përfaqësues i qeverisë amerikane ishte po aq i frustruar sa ai.
“Unë mendoj se qeveria e Kosovës mori një vendim në rrethana të vështira, gjë që e bëri një situatë tashmë të komplikuar shumë më keq. Dhe kjo rezultoi në një përkeqësim të mprehtë të marrëdhënieve amerikano-kosovare, dhe nuk shoh se si kjo i ndihmon dikujt,” tha Fried, duke shtuar se as vendosja e ushtrisë serbe dhe demonstrimet e forcës nuk janë shumë të dobishme.
“Kam vënë re se ambasadori Hovernier ka pasur mundësinë të vendosë përgjegjësinë tek të dyja palët, por ai nuk e ka pranuar”, tha Fried, i cili është ekspert i Këshillit joqeveritar të Atlantikut.
Sipas tij, KFOR-i u detyrua të ndërhyjë në komunën e Zveçanit – kur më shumë se një duzinë ushtarë të atij misioni në Kosovë u lënduan rëndë.
“Është një kohë e vështirë si në terren ashtu edhe për marrëdhëniet mes Amerikës dhe Kosovës dhe e gjithë kjo situatë është për të ardhur keq”, tha Fried, duke shtuar se shpreson që qeveria e Kosovës të gjejë një mënyrë për t’u rikthyer nga këto gabime fillestare.
“Qeveritë bëjnë gabime dhe shpresoj që deri diku, dhe ndoshta në tërësi, qeveria e Kosovës ta pranojë këtë. Mendoj se është e qartë ajo që dua të them – kjo nuk është një situatë e balancuar. Kjo është një situatë në të cilën ShBA mendojnë se qeveria e Kosovës ka bërë një gabim të rëndë”, tha Fried, duke theksuar se kjo e vështirëson edhe më shumë situatën.
I pyetur nëse është e justifikuar që ShBA-ja të fajësojë vetëm Kosovën, Fried tha se mendon se qeveria amerikane ka arsye për t’u frustruar dhe se rrënja e problemit nuk është përgjegjësi e Kosovës dhe e qeverisë së Kosovës.
“Përgjegjësia më e madhe është kryesisht e Serbisë dhe përpjekjeve të saj të vazhdueshme për t’i rezistuar realitetit të pavarësisë së Kosovës, të cilin serbët e dinë, mendoj se e dinë se është i përhershëm, se Kosova ka ikur. Për arsye të ndryshme nuk e pranojnë. Pra. përgjegjësia më e thellë është më shumë e palës serbe, por përgjegjësia individuale për këto incidente me ndërtesat komunale është vendim i Kosovës”, tha Fried.
Ai theksoi se kjo është arsyeja pse ShBA-të janë kaq të frustruar, sepse qeveria e Kosovës ka marrë një vendim të bazuar në një ndjenjë të kuptueshme, por abstrakte të sovranitetit, duke lënë KFOR-in dhe Shtetet e Bashkuara të merren me pasojat. /FolDrejt/
