Andrei Fedorov, ish-zëvendësministri i Jashtëm rus, i ka thënë Al Jazeera-s se ditët e ardhshme janë kyçe në pushtimin rus të Ukrainës, pasi urdhri fillestar i Presidentit Vladimir Putin ishte “përfundimi i operacionit ushtarak me një fitore deri më 2 mars”.
Të dielën Fedorov u shpreh se, kishte shpresë për bisedimet e shpallura midis dy vendeve ndërsa Moska vazhdon sulmin e saj në shkallë të plotë ndaj fqinjit të saj.
“Duhet të zhvillohen bisedime pa parakushte. Unë e di pozicionin e miqve të mi në Kiev dhe udhëheqjes së Ukrainës. Ata janë gati të ulen dhe të bisedojnë, por pa parakushte”, tha ai, shkruan Al Jazera, transmeton Fol Drejt.
Ukraina dhe Rusia kanë rënë dakord të mbajnë bisedime në një vend afër kufirit me Bjellorusinë, tha më herët gjatë ditës presidenti ukrainas Volodymyr Zelenskyy.
Bisedimet, të parat e shpallura që kur Rusia nisi një pushtim të plotë të Ukrainës javën e kaluar, do të mbahen pa parakushte dhe janë rezultat i një telefonate midis Zelenskyy dhe homologut të tij bjellorus, tha udhëheqësi ukrainas.
Rezistencë e fortë
Fedorov tha gjithashtu se rezistenca në Ukrainë dhe sanksionet e vendosura nga Perëndimi kanë qenë më të forta se sa parashikonte Rusia përpara se të fillonte dhuna.
“Siç thashë një herë… ju lutem, sepse e njoh Ukrainën, askush nuk do të takojë trupat ruse me lule. Ky është një realitet,” tha ai për AJ.
Për sanksionet, ish-zëvendësministri tha: “Ata gjithmonë mendojnë se, në rregull… ne jemi një vend i madh, ne jemi një vend i madh. Ne ju furnizojmë me gaz dhe naftë. Ju kurrë nuk do të përdorni më sanksione … sanksione të tilla. Ky është realiteti për sot dhe ka shkaktuar shumë probleme këtu tani.”
Aleatët perëndimorë të Ukrainës kanë vendosur sanksione të paprecedentë në përgjigje të pushtimit tokësor, detar dhe ajror të Rusisë.
“Për herë të parë ndonjëherë, Bashkimi Evropian do të financojë blerjen dhe dërgimin e armëve dhe pajisjeve të tjera në një vend që është nën sulm”, tha të dielën Presidentja e Komisionit Evropian Ursula von der Leyen.
Ajo tha se BE do të mbyllë hapësirën e saj ajrore për avionët rusë, duke përfshirë avionët privatë të oligarkëve rusë.
Blloku do të ndalojë rrjetin televiziv shtetëror rus Russia Today dhe agjencinë e lajmeve Sputnik. Von der Leyen tha se kjo ishte për t’i bërë ata të paaftë për të “përhapur gënjeshtrat e tyre për të justifikuar luftën e Putinit dhe për të mbjellë ndarje në Bashkimin tonë”./A.K/FolDrejt/
