Tre gra, përfshirë një mikeshë të kryeministres së re të Italisë, u vranë kur një burrë hapi zjarr në një kafene në Romë, duke plagosur edhe dy gra dhe dy burra të tjerë, shkruan BBC, përcjell Fol Drejt.
Ata që ishin brenda po mblidheshin si pjesë e komitetit të banorëve të një blloku lokal.
Roberto Gualtieri, kryebashkiaku i Romës, i përshkroi të shtënat si një “episod të rëndë dhune” dhe tha se do të marrë pjesë në një takim urgjent të hënën.
Një i dyshuar, 57 vjeç, është në paraburgim. Ai ka një histori mosmarrëveshjesh me disa nga bordi i komitetit, thonë raportet.
Luciana Ciorba, nënkryetarja e komitetit, ishte në kafenenë në lagjen Fidene, raporton gazeta italiane La Repubblica.
Ajo tha se personi i armatosur kishte hyrë në lokal të dielën duke bërtitur “Unë do t’ju vras të gjithëve” përpara se të përdorte pistoletën e tij. Ai thuhet se ishte kapur nga banorë të tjerë përpara se të ndalohej nga policia.
Nga ata persona të plagosur, që besohet se janë dy gra dhe dy burra, njëri është në gjendje të rëndë.
Kryeministrja Giorgia Meloni tha se një nga gratë e vrara ishte mikeshë e saj, Nicoletta Golisano. Emrat e grave të tjera të vdekura janë Elisabetta Silenzi dhe Sabina Sperandio.
Në një postim në Facebook, ku i dërgoi ngushëllimet familjes së zonjës Golisano, zonja Meloni tha se do ta kujtonte gjithmonë shoqen e saj si person “i bukur dhe i lumtur”.
“Nicoletta ishte një nënë mbrojtëse, një shoqe e sinqertë dhe e matur, një grua e fortë dhe e brishtë në të njëjtën kohë”, ka shkruar ajo.
“Por mbi të gjitha ajo ishte një profesioniste me një ndjenjë detyre jashtë të zakonshmes… Nikoletta ishte shoqja ime”.
“Nuk është e drejtë të vdesësh kështu”, shtoi ajo. “Nicoletta ishte e lumtur dhe e bukur me fustanin e kuq që bleu për festën e ditëlindjes së saj të 50-të disa javë më parë. Për mua ajo do të jetë gjithmonë e bukur dhe e lumtur kështu.”
Zonja Meloni tha gjithashtu se një poligon qitjeje nga i cili dyshohet se vrasësi kishte vjedhur armën e përdorur në sulm është mbyllur dhe gjendet nën hetim.
Policia ende nuk ka komentuar motivin e të dyshuarit, i cili është përmendur nga shtypi italian, por jo zyrtarisht. Sulmi nuk mendohet të ketë qenë politik.
Raportet sugjerojnë se i dyshuari dhe bordi i banorëve të pallatit kanë pasur një mosmarrëveshje të ashpër për disa kohë.
Giorgia Meloni, udhëheqëse e partisë së ekstremit të djathtë të Italisë, Vëllezërit e Italisë, u bë kryeministrja e parë femër e vendit në tetor. /FolDrejt/
