Mediat ndërkombëtare raportojnë për luftime të ashpra në Palestinë, ndërsa numri i të vrarëve nga të dyja palët, vijon të rritet, shkruan Fol Drejt.
Sipas Al Jazeera-s, së fundi një seri raketash janë lëshuar nga Libani jugor drejt Izraelit ndërsa Gaza po vijon të bombardohet.
Ushtria izraelite ka thënë se po i përgjigjet me zjarr artilerie lëshimeve të raketave nga Libani.
Ndërsa luftimet kanë hyrë në ditën e katërt me radhë, Rripi i Gazës është kthyer në rrënoja.
Një burim sigurie i tha agjencisë së lajmeve Reuters të martën se bombardimet u kryen nga fraksionet palestineze. Një burim i dytë tha se granatimet po goditnin zonën jugore nga e cila u lëshuan raketat.
Sipas Associated Press, helikopterë dhe automjete ushtarake janë parë në lëvizje në jug të Izraelit në ditën e katërt të luftës.
Njohësit e zhvillimeve atje, si dhe specialistët e sigurisë, janë duke thënë se Izraeli është kapur në befasi, ndërsa sistemi i sigurisë, është vënë në provë, duke e kontestuar edhe efikasitetin e tij./FolDrejt/
