“Është mbresëlënëse në shumë mënyra. Është mbresëlënëse për mua që jam i pari dhe mbresëlënëse për komunitetin tonë që u desh kaq shumë kohë që të vinte ky rast”, tha gjyqtari Lincoln Crowley
Në Australi u betua gjyqtari i parë indigjen i Gjykatës së Lartë në Queensland, shkruan AA, transmeton Fol Drejt.
Televizioni lokal ABC News njoftoi se këtë mëngjes u betua gjyqtari Lincoln Crowley, i cili u nominua për postin në Gjykatën e Lartë në Queensland muajin e kaluar.
Crowley citohet të ketë thënë pas ceremonisë së betimit se ishte “jashtëzakonisht krenar dhe i përulur” dhe se ky ishte “gjithashtu një rast i rëndësishëm dhe historik për popullin (indigjen) të Kombeve të Para të këtij shteti dhe në të vërtetë të këtij vendi”.
Në ceremoni morën pjesë edhe një numër i madh i juristëve dhe opinionit të gjerë.
“Është mbresëlënëse në shumë mënyra. Është mbresëlënëse për mua që jam i pari dhe mbresëlënëse për komunitetin tonë që u desh kaq shumë kohë që të vinte ky rast”, shtoi ai.
Më parë, kryeministrja e shtetit federal Queensland, Annastacia Palaszczuk dhe Prokurori i Përgjithshëm Shannon Fentiman mirëpritën emërimin e Crowley-t.
“Z. Crowley, një pasardhës i popujve Warramunga nga Territori Verior i cili u rrit në veri të Queensland-it, është gjyqtari i parë aborigjen i Gjykatës së Lartë të shtetit,” tha kryeministrja.
Sipas “Australian Healing Foundation”, një organizatë që punon për njerëzit aborigjenë dhe banorët e ishullit Torres Strait, autoritetet larguan me forcë dhjetëra mijëra fëmijë nga familjet indigjene midis 1910 dhe 1970 sipas politikës së qeverisë.
Sipas politikave të tilla, fëmijët detyroheshin të asimiloheshin në shoqërinë dhe kulturën e bardhë, ndërsa prindërit nuk lejoheshin të takonin fëmijët e tyre. Gjithashtu, fëmijët nuk lejoheshin të flisnin gjuhën e tyre amtare.
Sipas Institutit Australian të Shëndetit dhe Mirëqenies (AIHW), rreth 33.600 të mbijetuar nga Gjeneratat e Vjedhura jetojnë në shtete të ndryshme të vendit, ndërsa rreth 27.000 prej tyre janë mbi moshën 50 vjeç.
Më 13 shkurt 2008, kryeministri i atëhershëm australian Kevin Rudd në emër të kombit u kërkoi zyrtarisht falje australianëve indigjenë për trajtimin çnjerëzor në të kaluarën./FolDrejt/
