Faqja qeveritare Integrimi Evropian i Kosovës ka ndarë disa informacione shtesë për ditët e qëndrimit brenda zonës Schengen për qytetarët e Kosovës të cilët udhëtojnë për në zonën Schengen pas 1 janarit 2024.
Sipas tyre mund të qëndroni 90 ditë në çdo periudhë 180 ditore brenda zonës Schengen.
“Nëse udhëtoni disa herë, duhet të llogaritni me kujdes ditët e qëndrimit, pasi periudha e përgjithshme e qëndrimit nuk duhet të kalojë totalin prej 90 ditësh brenda periudhës 180 ditore”, thuhet në njoftim.
Periudha e llogaritjes së 90 ditëve fillon që nga momenti kur ju hyni për herë të parë në zonën Schengen.
Më tej aty thuhet se “nëse më datë 1 janar 2024 ju hyni për herë të parë në zonën Schengen ju keni të drejtë qëndrimi vetëm deri me 30 mars, 2024. Periudha e ardhshme gjashtë mujore fillon pas 180 ditësh ose më saktë me 29 qershor 2024, kur ju përsëri mund të udhëtoni”.
“Nëse udhëtoni shpesh në zonën Schengen , duhet të numëroni ditët e mbetura nga periudha e fundit gjashtë mujore. Ju mund të hyni në zonën Schengen më shumë se një herë gjatë periudhës 90 ditëshe. Por, duhet të llogaritni me kujdes ditët e qëndrimit tuaj si periudhën e përgjithshme të qëndrimit, e cila nuk duhet të kalojë totalin e përgjithshëm prej 90 ditësh të qëndrimit brenda periudhës 180 ditëshe”, vijon në njoftim.
