Ndikimi i mundshëm i tensioneve Rusi-Ukrainë në furnizimet me energji ka bërë që Japonia të konsiderojë devijimin e rezervave të saj të gazit natyror të lëngshëm (LNG) në Evropë. “Japonia planifikon të sigurojë një pjesë të rezervave të saj të LNG-së në Evropë, pasi tensionet midis Rusisë dhe Perëndimit mbi Ukrainën minojnë sigurinë energjetike në rajon”, thanë burime të qeverisë japoneze për ‘Kyodo News’.
Burimet thanë se Tokio “do të sigurojë furnizim të mjaftueshëm për nevojat e brendshme përpara se të ndihmojë vendet evropiane që do të përballen me kërcënimin e ndërprerjes së furnizimit me gaz rus në rast të një inkursioni nga Moska në Ukrainë”.
Derisa qeveria e kryeministrit Fumio Kishida po diskuton vëllimin dhe kohën e devijimit të LNG-së në Evropë, ajo për këtë lëvizje gjigante po ashtu mund të kërkojë bashkëpunim nga kompanitë japoneze të përfshira në biznesin e LNG-së, shkruan AA, transmeton Fol Drejt.
Tensionet në Ukrainë po rriten tashmë disa muaj pasi Rusia grumbulloi dhjetëra mijëra trupa pranë kufirit të Ukrainës, për të cilën Perëndimi thotë se është përgatitje për luftë. NATO dhe Bashkimi Evropian (BE) kanë paralajmëruar për pasoja të rënda nëse Moska pushton fqinjin e saj.
Rusia në vazhdimësi ka mohuar se planifikon të sulmojë Ukrainën, duke këmbëngulur se trupat e saj ndodhen atje vetëm për stërvitje.
Plani i Tokios për të devijuar rezervat e LNG-së në Evropë vijnë pasi SHBA kërkoi nga Japonia “të zgjerojë ndihmën e energjisë për të siguruar furnizime të qëndrueshme të energjisë në rajon gjatë dimrit”.
Rusia furnizon rreth 40 për qind të kërkesës totale të gazit të Evropës.
Në një takim javën e kaluar, shefi i politikës së jashtme të BE-së, Josep Borrell, tha se Rusia nuk do të hezitojë të përdorë furnizimet e saj me energji në Evropë si një “armë për përfitime gjeopolitike” derisa çmimet e energjisë në mbarë botën po rriten.
Megjithatë, raporti tha se në muajin shkurt në Japoni “kërkesa e LNG-së për ngrohje po tejkalon ofertën”.
“Ne do të studiojmë nëse mund të bëjmë ndonjë gjë pa ndikuar në jetën e përditshme të njerëzve”, tha në fillim të këtij muaji ministri japonez i Ekonomisë dhe Industrisë, Koichi Hagiuda.
