Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, ka reaguar pas deklaratave të ministres së Arsimit, Shkencës, Teknologjisë dhe Informacionit (MASHTI), Arbërie Nagavci, e cila ka shprehur çudi pse SBASHK-u po kërkon vetëm 100 euro shtesë për punëtorët e arsimit deri në miratimin e Ligjit të Pagave.
“Pyetja ime për SBASHK-un ka qenë pse pikërisht 100 euro, pse jo 300 apo 500, apo 80. Pse vetëm për punëtorët e arsimit dhe jo tjerët, apo pse për të gjithë punëtorët e arsimit njëjtë”, ka deklaruar Nagavci sot në një konferencë për media.
E ndaj kësaj deklarate ka reaguar Jasharaj, duke e quajtur “humor pa kripë”.
“Kur jemi te kjo kërkesa modeste drejtuar Qeverisë për 100 euro shtesë në paga, Ministrja Nagavci bëri një humor pa fije kripe duke na kritikuar se pse paskemi kërkuar pikërisht 100 euro e jo, bie fjala, 300 euro. Ministre ne e kemi ditur se kjo kërkesë është minimale dhe e pamjaftueshme karshi gjithë këtyre ngritjeve të çmimeve, por e kemi bërë sepse mund të realizohej po të donte Qeveria. Nëse ju mendoni se kemi kërkuar pak dhe nuk e keni me tallje, atëherë si Ministre e tërë arsimit që je, kërko dhe realizo në Qeveri kërkesën tënde për 200 a 300 euro shtesë dhe ne do të jemi më të lumturit dhe do të ndjehemi krenar me ty”.
Përmes një komunikate për media, Jasharaj ka thënë se as Bashkimi i Sindikatave të Pavarura të Kosovës (BSPK), si përfaqësuese e shumicës së Federatave sindikale, as SBASHK-u si përfaqësuese e të punësuarve në tërë sektorin e arsimit dhe në shumë nga institucionet e kulturës, nuk kanë qenë të kyçur as edhe një herë në punën e komisionit hartues të Ligjit të Pagave.
Po ashtu, sipas tij, as edhe një herë nuk e kanë pranuar zyrtarisht versionin final të këtij ligji.
“Kërkuam me muaj takime, u organizuan edhe veprime sindikale me protesta e grevë njëorëshe për ta nxitur Qeverinë për dialog e marrëveshje dhe ajo nuk bëri as edhe një milimetër angazhim dhe pikërisht një ditë a dy para se BSPK-ja të shpallte grevën e përgjithshme Ministri Sveçla doli me deklaratën se e paska nisur për proceduara Ligjin e ardhshëm të pagave. Kemi të drejtë të dyshojmë se kjo u bë për t’u krijuar mjegull dhe hamendje të njerëzit”, thuhet në komunikatën për media.
Jasharaj mes tjerash ka deklaruar se BSPK-ja e as SBASHK-u nuk kanë qëndrim zyrtar për Ligjin e Pagave “sepse nuk ishin pjesë e përgatitjes së tij e as që e kanë marrë këtë version në rrugë zyrtare”.
Madje sipas tij, sindikalistët kanë të drejtë të dyshojnë se kjo është bërë për t’u krijuar mjegull dhe hamendje të njerëzit.
“Në medie është filluar të botohen shkrime se sa kujt do t’i bëhet paga e madje diku- diku përmendet edhe vlera 120 euro për koeficientin. Mund të ketë aty këtu edhe individë që po bëjnë llogari se sa do t’u bëhet paga me “Ligjin e pagave” që paska nisur rrugëtimin drejt procedurave”.
“Të punësuarve në sektorin publik duhet thënë të vërtetën se çdo gjë për Ligjin e pagave mbetet supozim dhe edhe nëse arrihet pajtueshmëri e Qeverisë me sindikatat për këtë Ligj duhen muaj e muaj deri sa nuk bëhet aprovimi nga deputetet e Parlamentit e pastaj, sikur kjo mos të mjaftonte, në këtë version thuhet se 8 muaj pas publikimit në Gazetën zyrtare pritet të nisin pagat sipas këtij Ligji dhe atë nëse, prite o Zot, mos u dërgoftë në Kushtetuese e për t’u zhvleftësuar prapë e për t’u kthyer në pikën zero prapë”.
“Këto mund të ndodhin dhe prandaj është kërkesë legjitime e SBASHK-ut dhe e gjithë sindikatave tjera në BSPK që deri sa nuk fillon shteti të jap paga në bazë të Ligjit të pagave, ligj ky që do të ishte produkt i marrëveshjes së Qeverisë me sindikatat, Qeveria të bëj një shtesë prej 100 euro në pagë për të gjithë të punësuarit në arsim dhe sektorët tjerë me arsyetimin e argumentuar se kanë ndodhur ngritje shumë të mëdha të çmimeve të artikujve elementar të jetës”.
Në fund, Jasharaj ka theksuar se “qasja e gabueshme e Qeverisë ndaj sindikatave dhe dialogut, krijimi i mjegullës me apo pa qëllim për Ligjin e pagave dhe ligjet tjera dhe humori pa krip e kanë sjellë situatën deri të greva e përgjithshme dhe nëse Ministrja Nagavci dhe Qeveria e kanë vërtetë hallin të nxënësit dhe orët e ditët e humbura nga greva, le të nisin me dialogun dhe plotësimin e kërkesave të të sindikatave, që janë në kuadër të BSPK-së”. /Telegrafi/
