Drejtori ekzekutiv i EPIK-ut, Demush Shasha, ka paralajmëruar votimin final për liberalizim të vizave për Kosovën në një seancë të Parlamentit Evropian (PE), shkruan Fol Drejt.
“Javën e ardhshme liberalizimi i vizave për Kosovën do të votohet në seancën plenare të Parlamentit Evropian. Ky është votimi final në procesin e liberalizimit të vizave. Më nuk do të këtë lajme për “edhe një votim” apo “edhe një hap”. Ky është fundi. Dhe fakti që më vjen kaq zor të shqiptoj fjalën “urime” tregon sa i dhimbshëm ka qenë ky proces” – ka shkruar Shasha.
Ndryshe, më 14 dhjetor të vitit të kaluar Ambasadorët e Bashkimit Evropian (BE) e kanë miratuar tekstin e kompromisit për liberalizimin e vizave për qytetarët e Kosovës.
Ekipet negociuese të Parlamentit Evropian dhe kryesisë së Këshillit të BE-së, arritën marrëveshjen për projekt-rregulloren për udhëtimin pa viza për poseduesit e pasaportave të lëshuara nga Kosova.
Seanca plenare e Parlamentit Evropian parashihet të mbahet më 18 prill dhe ky do të jetë votimi final.
Në rast se kosovarëve iu hiqet regjimi i vizave, ata do të mund të udhëtojnë pa to, më së largu nga 1 janari i vitit 2024./FolDrejt/
