Kryetari i Partisë Popullore, Vuk Jeremiq, ka thënë sot se nuk mjafton që ministri i Jashtëm Ivica Daçiq të marrë pjesë në seancën e Këshillit të Sigurimit të OKB-së të enjten, por presidenti i Serbisë, Aleksandër Vuçiq, duhet të shkojë në Nju Jork për seancën dhe të shprehet qartë se Serbia kundërshton anëtarësimin e Kosovës në OKB, shkruan Danas, përcjell Fol Drejt.
Jeremiq vlerësoi se Vuçiq duhet të ftojë Rusinë dhe Kinën që të votojnë kundër anëtarësimit të Kosovës në OKB nëse ndonjëherë kjo çështje del në rend dite.
“Nëse ka një grimë të vërtetë se Serbia kundërshton anëtarësimin e Kosovës në OKB, atëherë Vuçiq duhet ta shpallë personalisht në seancën e Këshillit të Sigurimit të enjten, sepse ka dhënë pëlqimin e tij për zbatimin e marrëveshjes franko-gjermane në të cilën shkruhet se Serbia nuk do ta bllokojë anëtarësimin e Prishtinës në organizatat ndërkombëtare dhe Daçiq nuk ka qenë në dhomën ku ka negociuar Vuçiq. Lidhur me këtë, Daçiq nuk ka ngrënë qepë dhe as nuk ka nuhatur qepë, tha Jeremiq për Radiotelevizionin Vojvodina.
Kryetari i Partisë Popullore kujtoi se Rusia aktualisht kryeson Këshillin e Sigurimit dhe se në Nju Jork ndodhet edhe ministri i Jashtëm rus Sergej Lavrov.
“Pse askush nga Serbia nuk e ka thirrur Moskën dhe nuk ka kërkuar që Lavrov, i cili sipas të dhënave zyrtare duhet të largohet nga Nju Jorku të mërkurën, të qëndrojë një ditë më shumë dhe të marrë pjesë në seancën për Kosovën? Nëse dikush do ta kishte thirrur dhe do ta kishte pyetur, jam i sigurt se ai do të kishte qëndruar dhe Vuçiq mund të kërkonte që Rusia të thotë se do të përdorë veton kundër anëtarësimit të Kosovës në OKB dhe Lavrov do ta mbështeste atë para të gjithëve, tha Jeremiq.
Ai vlerësoi se në atë rast “do të binte në ujë pika e marrëveshjes franko-gjermane, sipas së cilës Serbia nuk do të kundërshtojë anëtarësimin e Kosovës në organizatat ndërkombëtare”.
Jeremiq deklaroi se nëse Vuçiq nuk shkon në Nju Jork të enjten, do të thotë se ai nuk lejohet të paraqitet atje, sepse ai ishte zotuar se Serbia nuk do ta bllokonte Kosovën dhe se kishte gënjyer opinionin në Serbi.
“Nëse Vuçiq nuk shkon në Nju Jork, ne do të hyjmë në një spirale që do të kulmojë me anëtarësimin e Kosovës në OKB, siç u votua të hënën për fillimin e procedurës për pranimin e Kosovës në Këshillin e Evropë”, tha ish-presidenti i Asamblesë së Përgjithshme të OKB-së.
Jeremiq vlerësoi se referendumi është “e vetmja mënyrë për t’ia lidhur duart regjimit” në zbatimin e planit franko-gjerman dhe shtoi se përveç referendumit, nuk ka asnjë proces tjetër zgjedhor që Vuçiq ta humbë tani.
“Qeveria nuk ka asnjë përgjigje ndaj nismës së Partisë Popullore për shpalljen e referendumit për atë plan. “Vuçiq i përgjigjet çdo personi në Instagram që thotë diçka kundër tij, e vetmja gjë që nuk e ka përmendur kurrë është referendumi, sepse e di që është vetëvrasje për të, pasi ai është në pakicë dhe shumica e popullit është kundër marrëveshje”, tha Jeremiq.
Ai u bëri thirrje qytetarëve që të nënshkruajnë iniciativën për shpalljen e referendumit.
“Ne nuk po kërkojmë që të shkojnë në Prizren apo të luftojnë me policinë, por vetëm të nënshkruajnë. Kur populli thotë ‘jo’ si bartësi suprem i sovranitetit, atëherë mbaron dhe atëherë anëtarët e organizatave joqeveritare, ekspertët dhe diplomatët mund të thonë çfarë të duan”, tha Jeremiq dhe kujtoi se populli i Greqisë e hodhi poshtë planin për privatizimin e ishujve dhe se në referendumin në Britaninë e Madhe qytetarët vendosën të largohen nga BE.
Kryetari i Partisë Popullore ka vlerësuar se është bërë “dëm i pariparueshëm” me inicimin e procedurës për pranimin e Kosovës në Këshillin e Evropës dhe se ka qenë “pasojë e drejtpërdrejtë e zbatimit të planit franko-gjerman”.
“Do të ketë gjithnjë e më shumë hapa të pakthyeshëm nëse nuk ia lidhim duart regjimit dhe nuk e pengojmë zbatimin e mëtejshëm të planit “franko-gjerman”. “Në radhë është hyrja e Prishtinës në UNESCO, Interpol dhe në fund në NATO dhe OKB”, tha Jeremiq.
I pyetur për votën abstenuese të Greqisë për pranimin e Kosovës në Këshillin e Evropës, Jeremiq u përgjigj se ky votim ishte kryesisht pasojë e marrëdhënieve ndërmjet lidershipit të Serbisë dhe Turqisë.
“Nëse rrini me Erdoganin, atëherë mos prisni shumë nga Greqia”, tha Jeremiq. /FolDrejt/
