Gazetari Vehbi Kajtazi, ka thënë se pozita e kryeprokurorit të Shtetit është një nga më të rëndësishmet në institucionet e Republikës së Kosovës.
Teksa ka komentuar zhvillimet e fundit mbi procesin e zgjedhjes së kryeprokurorit të shtetit, Kajtazi është shprehur se në raste të ndryshme, edhe vite më parë, ka pasur implikime nga jashtë për ta favorizuar apo dëmtuar dikë prej kandidatëve.
“Është pozitë shumë e rëndësishme, një nga më të rëndësishmet. Bile Kurti tha se “pas pozitës time, kjo është më e rëndësishme”. Doli hapur në mbështetje të njërit prej kandidatëve, edhe pse nuk e kanë thënë publikisht. Prandaj, interesimi i publikut është i madh dhe nuk ka kurrgjë të keqe që me pasë interesim dhe me monituru secilin detaj për kryeprokurorin e shtetit”, tha ai në RTV Dukagjini.
“Në raste kur është zgjedhur kryeprokurori i shtetit, unë kam parë, implikime të mëdha nga jashtë për të favorizu dikë apo dëmtu në garë. Në rastin e tashëm, unë pajtohem që vlerësimi për integritetin nuk ka qenë real. Për faktin që ke njerëz që nuk kanë pasur asnjë masë disiplinore dhe kanë marrë pikë minimale, dhe dikujt tjetër më shumë, kjo nuk është në rregull. Kjo pjesë, për mua duhet me u diskutu. Sidoqoftë, ata janë një panel dhe janë subjektiv në vlerësim. Siç është subjektive kritika jonë prej jashtë”.
Po ashtu, Kajtazi tha se ka mundur që ky proces të menaxhohet më mirë për t’i eliminuar problemet.
Mes tjerash, ai tha se Qeveria Kurti prej ardhjes së saj në pushtet, ka një plan për kapjen e sistemit të drejtësisë në Kosovë.
“Qeveria Kurti ka plan për kapjen e prokurorisë dhe gjyqësorit. Në kuadër të këtyre përpjekjeve ka pasur edhe debat sot në Kuvend. Nuk e di a duhet të kthehet në pikën zero procesi i konkursit të KPK-së. Edhe nëse tërhiqet, çka dëshirojnë me bo?, me i ndryshu pyetjet apo çka? që në mënyrë të jetë i pëlqyeshëm për shumicën e njerëzve. Këtu ka një garë në publik se kush me kë është. Qeveria ka qenë pro Armend Hamitit. Absolutisht po”, deklaroi ai.
