Balerini nga Gostivari, Andi Ismaili, ka arritur ta fitoj Kampionatin Europian në kategorinë junior në garat e baletit “Ido Europa” të zhvilluara në Shkup të Maqedonisë së Veriut. Balerini i talentuar aktualisht është edhe dy herë kampion bote në vallëzimin modern. Talenti shqiptar synon ta fitoj titullin e botës edhe për herë të tretë vitin e ardhshëm në Egjipt, shkruan Fol Drejt.
Andi Ismaili është 14-vjeçar dhe me balet merret që nga mosha nëntë vjeçare. Ai i ndjekë mësimet në shkollën fillore “Goce Delçev” në Gostivar. Karriera e tij ka filluar furishëm në garat ndërkombëtare. Brenda pesë viteve karrierë në artin e baletit, Ismaili ka arritur të fitoj dy herë vendin e parë në Kampionatin Botëror dhe së fundi edhe titullin e Kampionatit Europian.
Ismaili në garat ndërkombëtare përfaqësohet me klubin iDance Studio nga Gostivari. Andi ushtron në stilet e baletit kontemporan modern dhe xhaz. Për herë të parë Ismaili mori pjesë në garat e botërorit në vitin 2018 në Ossa të Polonisë dhe u rendit i pesti në kategorinë children.
Herën e dytë ishte prapë pjesëmarrës në garat e zhvilluara në Ossa të Polonisë më 2019 në kategorinë children, ku Andi Ismaili u shpallë Kampion Bote. Dy vite më vonë, më 2021, gostivarasi sërish ishte pjesë e garave ndërkombëtare në Varshavë të Polonisë në kategorinë junior dhe arriti ta fitoj vendin e parë dhe u bë kampion bote për herë të dytë.
Së fundi Ismaili u bë kampion europe në Shkup të Maqedonisë së Veriut. Në garat e organizuara për balet ishin 1 mijë e 900 pjesëmarrës nga 21 shtete të botës. Në kategorinë junior morën pjesë 21 garues, ku Andi Ismaili mori vendin e parë dhe u bë kampion europe.
E ardhmja shpresëdhënëse e Gostivarit në garat e baletit synon që ta fitoj edhe një herë kampionatin botëror. “Synoj që të bëhem edhe një herë kampion bote në garat që do të mbahen Sharm El Shaik të Egjiptit në dhjetor të vitit 2023. Shpresoj që në të ardhmen të bëhem balerin profesional dhe ta shoh veten në Hollywood”, shprehet Ismaili./G.O/FolDrejt/
