Ministri i Punëve të Jashtme të Katarit, Sheikh Mohammed bin Abdulrahman Al-Thani, tha se investimi në Rusi aktualisht është “nën shqyrtim të madh” dhe Katari nuk po mendon të rrisë investimet e tij atje derisa sa situata në Rusi të përmirësohet.
“Për momentin duke marrë parasysh situatën aktuale në Rusi nuk po mendojmë për ndonjë investim të ri atje. Edhe në Evropë, derisa të kemi njëfarë qartësie për stabilitetin e situatës. Jo e gjithë Evropa, por zonat ku po ndjejmë se ka disa tensione ose mund të kemi ndonjë rrezik politik, sepse duhet ta shikojmë nga të gjitha dimensionet,” tha Al-Thani për CNN.
Autoriteti i Investimeve të Katarit (QIA) ka investime të konsiderueshme në gjigantin rus të naftës Rosneft, për të cilin Al-Thani tha se ishte një vendim i marrë bazuar në “vlerësimin tregtar dhe është ende në vazhdim”, megjithatë, nuk do të rritet për momentin.
Ndërsa qëndrimi i Katarit është kundër çdo akti agresioni ose përdorimit të pushtetit kundër një vendi sovran, zyrtarët e Katarit thonë se po mbajnë të hapura çdo lloj ure komunikimi me të gjitha palët.
Ministri tha se diskuton shpesh me homologët e tij rusë dhe ukrainas për të ofruar ndihmën ose kontributin për të de-përshkallëzuar situatën dhe për t’i dhënë fund luftës.
“Ajo që unë besoj dhe nga biseda ime me homologun tim atje Sergei Lavrov është se ata janë të gatshëm të angazhohen në kërkesat që kanë parashtruar. Tani, sa larg është e gatshme të japë qeveria ukrainase për këto kërkesa, ky është në të vërtetë vendimi i qeverisë ukrainase dhe popullit ukrainas. Ne duhet të fokusohemi në një armëpushim, korridore humanitare, sjelljen e ndihmës humanitare në Ukrainë dhe në vend që të kemi këtë konflikt dhe mosmarrëveshje në një fushë beteje, për të qenë rreth tryezës”, tha ministri i Katarit.
Katari shpesh ka luajtur një rol ndërmjetësues në zbutjen e konflikteve dhe sjelljen e kundërshtarëve në tryezë, veçanërisht midis Talebanëve dhe Shteteve të Bashkuara dhe midis Perëndimit dhe Iranit.
