Autoritetet e Kenias kanë bërë të ditur se një shtetas holandez me origjinë nga Eritrea, i kërkuar për trafikim njerëzor me “njoftim të kuq” të Organizatës Ndërkombëtare të Policisë Kriminale (Interpol), është deportuar në Holandë, shkruan AA, transmeton Fol Drejt.
Sipas njoftimit nga Drejtoria e Hetimeve Kriminale e Kenias (DCI), 53-vjeçari John Habeta ka qenë në arrati për katër vjet dhe besohet se drejtonte një rrjet ndërkombëtar nëntokësor të kontrabandës me qenie njerëzore, që trafikonte njerëz nga Afrika në Evropë.
Ai u arrestua në Nairobi pas një operacioni të fshehtë nga detektivët e DCI-së.
“Ai është i lidhur me të paktën katër operacione të ndryshme ku grupe shtetasish të Eritreas u trafikuan në Evropë përmes Azisë. Menjëherë pas arrestimit, ai u ekstradua në Holandë me urdhër të Ministrisë së Punëve të Brendshme”, thuhet në njoftim.
Autoritetet në Kenia paralajmëruan kriminelët se vendi i Afrikës Lindore nuk është “strehë për të arratisurit ndërkombëtar”.
Sipas Organizatës Ndërkombëtare të OKB-së për Migracionin (IOM), trafikimi i qenieve njerëzore në Afrikën Lindore ka qenë një problem i raportuar.
“Kërkesa për fuqi punëtore të trafikuar është dokumentuar në Afrikën Lindore në bujqësi, shërbime e minierave, punë shtëpiake dhe prostitucion. Njerëzit po ashtu raportohet se janë trafikuar për shërbimin ushtarak, martesë të detyruar dhe qëllime rituale”, thekson IOM.
