Mbi 150 minatorë të minierës së Kishnicës kanë hyrë në grevë që nga mëngjesi i kësaj të marte pasi duan nivelizim të pagave me minatorët e Trepçës.
Një nga minatorët e kësaj miniere, Albert Zymberi, për Klankosova.tv tha se greva e nisur në mëngjes do të vazhdojë deri në ora 15:30 kur edhe përfundon puna, për të vazhduar sërish ditët në vijim.
“Mbi 150 minatorë nga sot në ora 08:00 kemi hyrë në grevë deri në ora 15:30 për të vazhduar njësoj edhe ditët në vijim. Nivelizimi i pagave sikur minatorëve të Trepçës na u është premtuar nga 1 janari dhe nuk u realizua. Kjo u bë shkak për fillimin e grevës”.
“Ne jemi duke qëndruar nëpër vendet e punës por jemi në grevë”, tha ai.
Tutje, Zymberi tha se greva do të vazhdojë deri në plotësimin e kërkesa të minatorëve dhe se nivelizimi i pagave s’është kërkesa e vetme.
Ai, mes tjerash, tha se edhe ndalesa e parave për shujtën ditore u bë shkak për grevë, pasi sipas tij marrëveshja ishte ndryshe.
“Pos nivelizimi të pagave premtim nga menaxhmenti ka qenë edhe hapja e menzës, por tashmë ka filluar ndalimi i 90 eurove nga paga për shujtat teksa marrëveshja ishte që paratë për ushqim të mos ndalen nga pagat”, deklaroi Zymberi. /Klankosova.tv
