Partia Demokratike e Kosovës (PDK), kërkoi në seancën e sotme si pikë e parë e rendit të ditës të vendoset raportimi i ministres së Zhvillimit Ekonomik Artane Rizvanolli për arrestimet që kanë ndodhur dje në KEK, por kjo nuk gjeti përkrahje nga deputetët e pozitës, shkruan Fol Drejt
“Si Grup Parlamentar kërkojmë që si pikë e parë e rendit të ditës të vendoset raportimi i ministres së Zhvillimit Ekonomik mbi arrestimet që kanë ndodhur dje në KEK. Ne e dimë që KEK-u drejtohet nga një bord i emëruar nga qeveria, bordi ka emëruar një kryeshef që ka qenë zyrtar i lartë i LVV-së”, ka thënë Shefi i Grupit Parlamentar të PDK-së, Abelard Tahiri.
Ai ka shtuar se si grup parlamentar në vazhdimësi i kanë ngrit shqetësimet e tyre rreth abuzimeve që kanë ndodh dhe keqmenaxhimin e krizës energjetike në Republikën e Kosovës.
Sipas Tahirit tashmë është ngritur një komision hetimor dhe është përgatitur një dosje e cila do të dorëzohet në prokurori, andaj sipas tij, “është e nevojshme që ministrja sot të na tregojë se për çfarë abuzimesh bëhet fjalë, për çfarë tenderi është arrestuar kryeshefi i KEK-ut, sa është vlera monetare e abuzimeve që janë kryer etj.”
Megjithatë, [as propozimit të mocionit për ndryshim të rendit të ditës, kryetari i Kuvendit, Glauk Konjufca e ka hedhur në votim këtë propozim i cili nuk mori mbështetje nga deputetët.
Siç u mësua nga rezultati i votimit, 32 e deputetëve votuan pro dhe 45 ishin kundër./FolDrejt/
