Dibër, 5 shkurt – Këshilltarë të opozitës në Dibër kërkojnë që seancat e Këshillit të Komunës të transmetohen drejtpërdrejt në media, konkretisht në televizion – me qëllim që popullata të informohet në çdo moment për vendimet që sjell ky institucion lokal. Kërkesën për transmetim të drejtpërdrejt të seancave e parashtroi këshilltari i Alternativës, Fisnik Mela, ndërsa e njëjta gjeti mbështetje edhe nga këshilltarë të tjerë, shkruan gazeta KOHA.
“Nevojitet një transparencë maksimale e punës së Këshillit të Komunës Dibër. Jetojmë në një shoqëri demokratike dhe zgjedhësit duhet të kenë një informim të tërësishëm për aktivitetin e Këshillit komunal”, tha këshilltari Mela, ndërsa sqaroi se në prag të zgjedhjeve dhe në aktivitete parazgjedhore, pikërisht transparenca si fjalë ishte përdorur pothuajse nga të gjitha partitë politike. Mela u shpreh se nëse realizohet një transmetim i drejtpërdrejt i seancave, banorët e Dibrës faktikisht do të kenë mundësi të njihen me vendimet që sjell Këshilli dhe me punën dhe angazhimin të këshilltarëve që i kanë përzgjedhur ata.
“Shumë komuna në vendin tonë bëjnë transmetim të seancave të Këshillit, meqë me të vërtet kjo mënyrë e funksionimit të informimit është efektive dhe jep kontribut të madh për një transparencë të këtij institucioni lokal”, arsyetoi Mela. Në debatin që u zhvillua në lidhje me këtë kërkesë, këshilltarët në pjesën më të madhe janë të mendimit se është një mundësi e mirë për një transparencë të plotë të këshillit. Kryetari i Këshillit, Bashkim Mashkulli, pas debatit theksoi se duhet të ndërmerren aktivitete për mënyrën teknike të transmetimit të drejtpërdrejt të seancave, por shtoi se këto aktivitete duhet të realizohen pas zgjedhjeve të prillit.
Në kërkesën që kanë bërë këshilltarët të Alternativës e që është përkrahur menjëherë edhe nga këshilltarët e Aleancës për Shqiptarët, thuhet se një transmetim i drejtpërdrejt definitivisht do të zbardhte momente shumë domethënëse të punëve të partive politike që bëjnë pikërisht në institucionet lokale. Sipas tyre, deri tani nga puna e Këshillit të Komunës transmetohen në lajme dhe informatat më të gjëra nga mediat lokale, rajonale dhe qendrore, por që ata nuk kanë mundësi të përcjellin të gjithë punën e Këshillit. Kërkesën e opozitës e kanë përkrahur edhe disa shoqata të mërgimtarëve dibran. Sipas tyre, puna e Këshillit të komunës ka një domethënie të madhe edhe për ata, meqë diaspora ka kontakte të rregullta me vendlindjen, ka shtëpitë e tyre në vendlindje, është e interesuar për të investuar dhe në këtë drejtim, kërkojnë informata më të shumta për situatën në Dibër. Disa shoqata madje kanë patur takime me këshilltarë të Dibrës pikërisht për këtë çështje. (koha.mk)
