Shtetet e Bashkuara besojnë se kundërofensiva e shumëpritur e Ukrainës do të jetë e suksesshme dhe do të çojë në rifitimin e territorit të rëndësishëm strategjik të vendit. Këtë e tha këshilltari i sigurisë kombëtare të Shtëpisë së Bardhë, Jake Sullivan, në një intervistë me Fareed Zakaria të CNN, përcjell Fol Drejt.
“Saktësisht sa dhe në cilat vende, do të varet nga zhvillimet në terren ndërsa ukrainasit do të fillojnë këtë kundërofensivë”, tha Sullivan. “Por ne besojmë se ukrainasit do të kenë sukses në këtë kundërofensivë”.
Ai shtoi se ShBA beson se kundërofensiva e shumëpritur ukrainase do të çojë në rifitimin e “territorit të rëndësishëm strategjik”.
Ai tha se zhvillimet në fushën e betejës do të kishin një “ndikim të madh” në çdo bisedim të ardhshëm.
“Por ajo që do të them është kjo: vetë Presidenti Zelensky ka thënë se kjo luftë do të përfundojë përfundimisht përmes diplomacisë”, tha Sullivan.
Më herët, ish-drejtori i CIA-s, gjenerali David Petraeus, tha se kundërofensiva e ushtrisë ukrainase do të jetë mbresëlënëse dhe do të arrijë kulmin e saj në tre deri në katër ditët e para. /FolDrejt/
