Peja në Fokus ka siguruar një dokument sipas së cilit ish imami Drilon Gashi, tani këshilltar në kabinetin e Kryetarit të Kuvendit Glauk Konjufca, në vitin 2018 kishte rrahur bashkëshorten e tij, rast për të cilën ishte gjykuar nga Gjykata Themelore në Pejë, transmeton Fol Drejt.
Sipas aktgjykimit dhuna është ushtruar pas një mosmarrëveshjeje për çështje familjare. Ish imami Gashi kishte ushtruar dhunë fizike ndaj gruas duke e goditur me grusht dhe më dru bashkëshorten e tij, duke i shkaktuar lëndime trupore.
Por, megjithatë, Gashi shpëton vetëm me një “Vërejtje Gjyqësore”, me të cilën i bëhet me dije se ka kryer vepër të dëmshme dhe të rrezikshme, që përbën vepër penale për të cilën nëse ai sërish e përsëritë, gjykata do t’i shqiptojë sanksione më të rëndë penale.
“Në shqyrtimin fillestar i pandehuri- pasi që paraprakisht i është lexuar aktakuza, është njoftuar me të drejtat dhe detyrimet procedurale, dhe pasojat e pranimit, përkatësisht mos pranimit të fajësisë. Drilon Gashi ka pranuar fajësinë dhe ka manifestuar keqardhje për atë se çfarë ka ndodhur. Këtë pranim të fajësisë, gjyqtari pasi që paraprakisht ka e ka marrë pëlqimin nga pakurori i shtetit dhe të dëmtuarës, i bindur se pranim-fajësinë i pandehuri e ka bërë ashtu siç e parasheh ligji – vullnetarisht pa u ndikuar nga askush dhe në asnjë mënyrë, e ka pranuar”, thuhet në vendim.
Veç tjerash lehtësimi ka ardhur si rrjedhojë edhe për shkak të asaj se Gashi i ka përmirësuar raportet me gruan.
Ndryshe, katër vite më parë Bashkësia Islame e Kosovës, kishte shkarkuar Drilon Gashin nga puna si imam i xhamisë Nur në Vitomericë të Pejës. Ndër arsyet ishte konsideruar edhe kontraversiteti gjuhësor që nuk përkon me Islamin. Ndonëse në qershor të vitit 2021 ishte raportuar për emërimin e tij si këshilltar në Kabinetin e Kryetarit të Kuvendit, Glauk Konjufca, emri i tij nuk figuron në uebfaqen e Kuvendit./FolDrejt/
