Shurupet medicinale të kollës, për të cilat autoritetet indoneziane dyshojnë se kanë shkaktuar vdekjen e më shumë se 200 fëmijëve në Indonezi, u zbuluan se përmbajnë kimikate industriale që një kompani indoneziane ua shiste fabrikave si farmaceutikë, tha policia e vendit.
Policia tha se dy përbërës, etilen glikol dhe dietilen glikol, u gjetën në disa shurupe me bazë paracetamol, të cilat çuan në dështim akut të veshkave te shumë fëmijë, raporton Reuters, përcjell Fol Drejt.
Këta dy përbërës përdoren në antifriz, lëngje frenash dhe kimikate të tjera industriale, por edhe si një alternativë më e lirë në disa produkte farmaceutike ndaj glicerinës, e cila është tretës ose trashës në shumë shurupe kundër kollës./FolDrejt/
