Konsumimi i tepërt i sheqerit është i dëmshëm për pamjen fizike dhe shëndetin e përgjithshëm, dhe shumë ushqime kanë më shumë sheqer sesa mendojnë njerëzit, raporton Klix, përcjell Fol Drejt.
Nëse i kushtoni vëmendje etiketave, mund të shihni se disa salca dhe produkte qumështi kanë më shumë sheqer sesa e imagjinonit. Prandaj, rekomandohet që të zgjidhni më me kujdes ushqimet për vaktet tuaja ditore.
Shmangni të gjitha llojet e lëngjeve
Dihet që lëngjet, veçanërisht ato të gazuara përmbajnë një sasi të madhe sheqeri, por edhe ato lëngje që shiten si natyrale dhe të shëndetshme mund të kenë një sasi të konsiderueshme sheqeri. Është mirë të pini shumë ujë, ujë mineral pa aromë të shtuar, çajra bimorë dhe kafe pa sheqer.
Shmangni salcat e gatshme
Salcat si ketchup, majonezë dhe ato të destinuara për sallata përmbajnë shumë sheqer. Megjithatë, shumica e njerëzve nuk janë të vetëdijshëm për këtë. Një porcion ketchup përmban afërsisht pesë gram sheqer. Përdorni salca pa sheqer të shtuar ose bëni salcën tuaj.
Kontrolloni sasinë e sheqerit në ushqimin e konservuar
Ushqimi i konservuar mund të jetë një shtesë e shkëlqyeshme për dietën tuaj, por duhet të siguroheni që të mos përmbajë shumë sheqer. Frutat dhe perimet përmbajnë sheqerna natyrale, të cilat nuk janë aq të rrezikshme, por kur shiten si ushqim të konservuar mund të përmbajnë sheqer të shtuar.
Shmangni mëngjeset e ëmbla
Një mëngjes i ëmbël nuk është alternativa më e mirë, sepse ngre papritmas nivelin e sheqerit në gjak. Përveç kësaj, shumë drithëra të blera në dyqane dhe të përpunuara si granola përmbajnë sasi të larta sheqeri, ndaj është më mirë t’i zëvendësoni me disa drithëra tjera si bollguri. /FolDrejt/
