Bilall Kasami e ka cilësuar aktin e rrëmbimit të tre policëve kosovarë nga ana e forcave speciale të policisë dhe ushtrisë serbe, si luftënxitës, shkruan Fol Drejt.
Sipas Kryetarit të Lëvizjes Besa, Bilall Kasamit, bëhet fjalë për një akt të pashembullt agresioni.
Ky është reagimi i plotë i Kasamit:
Kidnapimi i tre pjesëtarëve të policisë së Kosovës brenda territorit të Kosovës është një akt i pashembullt i agresionit nga ana e Serbisë mbi integritetin dhe sovranitetin territorial të Republikës së Kosovës. Ky kidnapim është akt i shëmtuar luftënxitës i Serbisë, e cila vazhdon të provokojë dhe rrezikojë me destabilitet gjithë rajonin, në kohën kur gjithë bashkësia ndërkombëtare angazhohet për një proces paqeje dhe integrimi. Aktet e këtilla janë në kundërshtim me angazhimet për paqe të faktorit ndërkombëtar dhe minojnë dialogun si vlerë demokratike. Nuk është hera e parë që Serbia kërcënon me agresione të këtilla që shkojnë kundër idesë së normalizimit të gjendjes në rajon përgjithësisht.
Shprehim solidaritetin dhe përkrahjen tonë të parezervë ndaj institucioneve të Kosovës dhe në të njëjtën kohë i bëjmë thirrje faktorit ndërkombëtar që të bëjë presionin e duhur mbi Serbinë që të lirojë pjesëtarët e policisë së Kosovës. Gjithashtu ftojmë gjithë bashkësinë ndërkombëtare demokratike të dënojë këtë akt agresioni mbi një shtet të pavarur për të mbrojtur parimet e sovranitetit dhe integritetit territorial./FolDrejt/
