Veprimet konfrontuese të SHBA-ve, Japonisë dhe Koresë së Jugut destabilizojnë rajonin e Gadishullit Korean dhe rrisin rrezikun e një lufte bërthamore, përfshirë në det, tha udhëheqësi i DPRK-së Kim Jong-Un gjatë vizitës së tij në komandën e Marinës së Koresë së Veriut, shkruan TASS.
“Para pak kohësh, liderët e bandave nga SHBA, Japonia dhe Koreja e Jugut u mblodhën dhe njoftuan se do të zhvillojnë stërvitje të ndryshme ushtarake dhe filluan ta bëjnë këtë. Për shkak të manovrave të pamatura konfrontuese të forcave armiqësore, përfshirë ato amerikane, ujërat përreth Gadishullit Korean u shndërruan në zonën më të madhe të përqendrimit të automjeteve ushtarake në botë dhe në ujërat më të paqëndrueshme me rrezik të një lufte bërthamore”, tha ai, sipas KCNA.
“Situata aktuale kërkon që marina jonë të ushtrojë të gjitha përpjekjet për të ruajtur gatishmërinë e vazhdueshme luftarake, gatishmërinë për të shtypur vullnetin e armikut në rast të rrethanave të paparashikuara”, shtoi lideri i Koresë së Veriut.
Kim Jong-Un vizitoi Komandën e Marinës me rastin e Ditës së Marinës.
Në mes të gushtit, presidenti i SHBA-ve, Joe Biden, kryeministri japonez Fumio Kishida dhe presidenti i Koresë së Jugut, Yoon Suk-Yeol mbajtën një samit trepalësh në Camp David pranë Uashingtonit. Gjatë samitit u ranë dakord për mbajtjen e stërvitjeve të përbashkëta vjetore me qëllim të forcimit të bashkëpunimit ushtarak. Në korrik, SHBA dhe Koreja e Jugut zhvilluan gjithashtu stërvitje që përfshinin një nëndetëse bërthamore amerikane.
Përveç kësaj, nëndetësja strategjike USS Kentucky që mbante armë bërthamore vizitoi portin e Koresë së Jugut të Busan.
