Kina është futur në gadishullin ballkanik me projekte të shumta infrastrukturore në kuadër të “Rrugës së Mëndafshit”, por së fundi ajo në disa shtete dërgon edhe teknologji vëzhgimi dhe armatime, shkruan media zvicerane NZZ.ch, duke e pasur parasysh blerjen e dronëve kinezë nga Serbia.
Serbia po armatoset vrullshëm. Ajo ka blerë aeroplanë rus MiG, kurse këtë verë është pajisur edhe me gjashtë dronë kinezë CH-92 A, duke u bërë kështu vendi i parë europian që blen këto ekzemplarë, përcjell foldrejt.com.
Deri në fund të vitit do porositen edhe gjashtë dronë tjera, me nga dy raketa që kanë një rreze veprimi deri 250km dhe shkon në lartësi deri 5000m me 200km/h. Poashtu, shumë serbë kanë shkuar në shkollat ushtarake kineze, për të mësuar për përdorimin e dronëve.
Këto zhvillime ndodhin përkundër Marrëveshjes së Uashingtonit, ku presidenti Aleksandër Vucic nënshkroi me Kosovën sëbashku që do largojnë teknologjinë 5G – duke nënkuptuar Kinën. Megjithatë, menjëherë pas kthimit nga Uashingtoni, Vucic është takuar me ambasadorin kinez në Beograd. Edhe pse ambasadori kinez tha se rruga e zhvillimit të marrëdhënieve me Serbinë ka barriera herë pas here, Vucic shtoi se s’do lejojë askënd që të prishë miqësinë me Kinën.
Politikë si në kohën e Titos
Në të njëjtën kohë Serbia është përfituesja më e madhe e fondeve europiane, pikërisht në kohën kur koketon më shumë me Kinën dhe Rusinë. Sipas medias zvicerane NZZ, kjo të kujton politikën e Josip Broz Tito i cili mbahej me të gjitha fuqitë, përcjell foldrejt.com.
Kina mbetet atraktive për Serbinë, pasi ajo përkundër investimeve të mëdha, asnjëherë nuk përzihet në çështje të brendshme.
Në këto kushte, lindën pyetja se çfarë armë duhet të blejë Kosova, për t’u balancuar sado pak me shtetet fqinje?/Foldrejt.com
