Nga Anna Akage, World Crunch
Më 6 prill, ministri i jashtëm rus Sergej Lavrov vizitoi Pakistanin për të diskutuar mbi paqen në Afganistan, furnizimet ushtarake dhe bashkëpunimin në sektorin bërthamor.
Kjo ishte vizita e parë e një zyrtari rus në vend që nga viti 2012.
“Ne mund ta konfirmojmë se Rusia do vazhdojë të ndihmojë në forcimin e potencialit antiterrorist të Pakistanit, duke përfshirë furnizimin e tyre me pajisjet e duhura”, tha Lavrov në konferencën për shtyp.
Sipas Lavrov, Rusia dhe Pakistani do të vazhdojnë të praktikojnë stërvitje të rregullta taktike të përbashkëta për të luftuar së bashku terrorizmin dhe piraterinë. Homologu i Lavrov, ministri i Jashtëm i Pakistanit, Shah Mahmood Qureshi, e përshkroi Rusinë si një prani stabilizuese në nivel rajonal dhe ndërkombëtar. Këta dy ministra të jashtëm ranë dakord të ndihmojnë Afganistanin në luftën e tij kundër fraksioneve të terrorit të brendshëm. Motivimi i tyre është i thjeshtë: Ndikimi në rritje i terroristëve në Afganistanin verior dhe atë lindor është një çështje shqetësuese e rëndësishme për të dy vendet.
Duhet theksuar se kjo vizitë zyrtare erdhi pak para afatit të 1 majit për largimin e trupave amerikane nga Afganistani si pjesë e marrëveshjes Uashington-Taliban të nënshkruar në vitin 2020. Kjo tani nuk ka gjasa të vazhdojë siç ishte parashikuar, raporton abcnews.al
“Ne presim një gjetje të hershme të një zgjidhjeje konstruktive për t’i dhënë fund luftës civile në Republikën Islamike të Afganistanit përmes marrëveshjeve për krijimin e një qeverie gjithëpërfshirëse me pjesëmarrjen e talebanëve,” tha Lavrov.
Qureshi gjithashtu informoi homologun e tij rus për situatën në Kashmirin e kontrolluar nga India dhe tha se kishte shpresa për ndihmën ruse në rajonin e Jammu dhe Kashmir. Kjo nuk është hera e parë që, pas dështimeve të shumta politike dhe ushtarake nga ana e qeverisë amerikane, Rusia ka ndërhyrë për të ofruar ndihmë dhe për të forcuar marrëdhëniet. Për herë të parë që nga viti 2001, Pakistani nuk është një prioritet i politikës së jashtme për administratën e re të SHBA-së.
Për më shumë se dy dekada, Pakistani ka qenë në qendër të Luftës kundër Terrorit – por jo këtë vit. Administrata e Biden do të përqendrohet në menaxhimin e marrëdhënieve të saj me fuqitë e mëdha si Kina dhe trajtimin e pasojave të pandemisë COVID-19, duke përfshirë sfidat e saj të mëvonshme ekonomike.
Dhe kur amerikanët largohen, rusët vijnë.
Sipas Lavrov, të dy vendet po diskutojnë gjithashtu mundësinë e bashkëpunimit së bashku për përdorimin e teknologjive bërthamore për qëllime paqësore jashtë sektorit të energjisë, si në fushën e mjekësisë dhe industrisë.
Sipas tij, kjo ka të bëjë me bashkëpunimin midis Rosatom, një korporate shtetërore ruse me seli në Moskë, e specializuar në energjinë bërthamore, dhe Komisionit të Energjisë Bërthamore të Pakistanit.
Me këtë miqësi të lulëzuar midis Rusisë dhe Pakistanit, ndryshimi duket i pashmangshëm për rajonin./abcnews.al
