Kolumbia tha të enjten se po pezullon përkohësisht një program që përfshin riatdhesimin e shtetasve kolumbianë të gjetur nga oficerët e imigracionit në kufirin e ShBA me Meksikën, transmeton Anadolu Agency, përcjell Fol Drejt.
Vendimi thuhet se është marrë për të protestuar ndaj mënyrës në të cilën autoritetet amerikane po i trajtojnë emigrantët, tha në një deklaratë Carlos Fernando Garcia, drejtor i agjencisë së migracionit të Kolumbisë.
“Përdorimi i elementeve kufizuese si prangat e duarve dhe këmbëve, madje edhe për gratë kryefamiljare, ka qenë një nga aspektet qendrore të negociatave me agjencitë për të dinjizuar trajtimin e kolumbianëve,” tha Garcia.
“Ka ankesa të përsëritura për kushte të këqija në qendrat e paraburgimit dhe keqtrajtim gjatë fluturimeve, të cilat përfaqësonin një faktor përcaktues në vendimin e marrë në orët e fundit,” shtoi ai.
Ai përmendi gjithashtu anulimin e dy fluturimeve të planifikuara për 1 dhe 2 maj nga Departamenti Amerikan i Sigurisë Kombëtare.
Fluturimet ishin pjesë e një plani pilot për të pritur rreth 1200 kolumbianë, kryesisht gra dhe fëmijë, midis 1 dhe 7 majit, përpara përfundimit të një kufizimi emergjent të imigracionit të njohur si Titulli 42.
Që nga nëntori i vitit 2022, numri i fluturimeve të kolumbianëve që kthehen nga SHBA është rritur. Ndërsa një vit më parë kishte një ose dy fluturime në muaj, tani janë rreth 20.
Numri i kolumbianëve që përpiqen të migrojnë në ShBA është rritur në vitet e fundit, me më shumë se 125,000 të kapur në kufirin jugor në 2022, nga rreth 6,200 në 2021, sipas Doganave dhe Mbrojtjes së Kufirit të ShBA. /FolDrejt/
