Presidentja e Komisionit Evropian Ursula von der Leyen ka propozuar mbajtjen e një takimi të Kolegjit të Komisionerëve me qeverinë ukrainase në Kiev në fillim të shkurtit, tha një zyrtar i Komisionit Evropian, raporton Ukrinform, përcjell Fol Drejt.
BE po planifikon të zhvillojë konsultime me Ukrainën në nivelin më të lartë, në një tjetër shfaqje mbështetjeje për vendin evropian që po përballet me një sulm brutal të paprecedentë nga Rusia.
Zyrtari tha se plani fillestar, i propozuar nga Komisioneri i Mjedisit Virginijus Sinkevicius, ishte që rreth “10 deri në 15 komisionerë” që punojnë në dosjet që lidhen me Ukrainën, duke filluar nga politikat tregtare te politikat dixhitale, duhet të takohen me homologët e tyre në Kiev. Qëllimi është “thellimi i mëtejshëm i marrëdhënieve” dhe solidariteti.
Është një “njohje e përparimit që po bën Ukraina në rrugën e saj drejt Evropës”, tha zyrtari.
Së bashku me Presidenten e Komisionit Ursula von der Leyen, komisionerët që po punojnë për Ukrainën që mund të bëjnë udhëtimin përfshijnë shefin e tregtisë së BE-së Valdis Dombrovskis; Komisioneri i Ekonomisë Paolo Gentiloni; shefi i Punëve të Jashtme Josep Borrell; Komisionerja e Punëve të Brendshme Ylva Johansson; Komisioneri i Buxhetit Johannes Hahn; Komisioneri i Fqinjësisë dhe Zgjerimit Oliver Varhelyi; Janez Lenarcic, përgjegjës për menaxhimin e krizave dhe ndihmën humanitare; Komisionerja e Shërbimeve Financiare Mairead McGuinness; dhe Komisioneri Sinkevicius. /FolDrejt/
