Komisioni Evropian njoftoi se ka nënshkruar kontrata me katër prodhues të vaksinave për rezervimin e kapacitetit të prodhimit të vaksinave në rast të epidemive të ardhshme, siç është pandemia Covid, raporton Politico, përcjell Fol Drejt.
Kontratat janë nënshkruar me gjigantin farmaceutik amerikan Pfizer, prodhuesit spanjollë të vaksinave HIPRA dhe CZ dhe kompaninë holandeze Bilthoven Biological dhe parashikon dhënien me qira të kapacitetit për prodhimin vjetor prej 325 milionë doza, me një çmim prej 160 milionë euro në vit.
Kontrata përfshin një sërë llojesh të ndryshme vaksinash: vaksinat mRNA, të cilat u prezantuan për herë të parë gjatë pandemisë Covid, si dhe vektorët viralë dhe vaksinat me bazë proteina. Kontrata është e tipit të hapur dhe vlen për të gjitha sëmundjet infektive nga të cilat mbrojnë vaksinat.
Bashkimi Evropian është i gatshëm të tregojë se ka nxjerrë një mësim nga pandemia e fundit, kur Covid-i u përhap me shpejtësi në të gjithë Bashkimin Evropian, për shkak të të cilit anëtarët e tij u detyruan të kontrollojnë përhapjen e virusit me masa të rrepta kufizuese.
Qëllimi i kësaj marrëveshjeje është të parandalojë që një skenar i tillë të përsëritet, nëse Bashkimi Evropian do të përballet sërish me një epidemi të ngjashme.
Sipas kushteve të kontratës, BE-ja paguan për kapacitetin e prodhimit të vaksinave kompanive farmaceutike, të cilat angazhohen të furnizojnë një numër të caktuar dozash, me kusht që të zhvillojnë një vaksinë të përshtatshme për sëmundjen që do të shpallej epidemi.
Kjo do të thotë se Komisioni Evropian do t’u paguajë kompanive farmaceutike një tarifë për mosshfrytëzimin e kapacitetit, në mënyrë që ta kenë në dispozicion në rast nevoje.
Bashkimi Evropian tashmë ka marrëveshje të ngjashme rezervimi të kapaciteteve për vaksinat e gripit të shpendëve me GlaxoSmithKline dhe Sekirus, pasi ekspertët e konsiderojnë sëmundjen një kandidat kryesor për pandeminë e ardhshme. /FolDrejt/
