KE-ja në përgjigje të propozimit të Finlandës dhe Estonisë që vendet e BE-së të mos lëshojnë viza turistike për qytetarët rusë tha se çështja është në kompetencë të vendeve anëtare.
Komisioni Evropian në përgjigje të propozimit të Finlandës dhe Estonisë që vendet e Bashkimit Evropian të mos lëshojnë viza turistike për qytetarët rusë tha se çështja është në kompetencë të vendeve anëtare, shkruan AA, transmeton Fol Drejt.
Propozimi i Finlandës dhe Estonisë ka ardhur në rend dite në konferencën javore për media të zëdhënësve të KE-së.
Anitta Hipper, një nga zëdhënëset e KE-së, në përgjigje të pyetjes “Si Komision i BE-së a e mbështesni këtë propozim?” rikujtoi se në muajin maj u pezullua pjesërisht marrëveshja që lehtëson vizat mes vendeve të BE-së dhe Rusisë.
“Vendet anëtare duhet të shqyrtojnë brenda kompetencave të tyre çdo aplikim për vizë. Vendet e BE-së mund të refuzojnë dhënien e vizës duke pasur parasysh politikat e tyre publike ose sigurisë së tyre të brendshme”, tha Hipper.
Duke vënë në dukje se vendet anëtare janë përgjegjëse për vlerësimin e aplikimeve për vizë dhe dhënien e vizës, Hipper shtoi se “Dhënien e vizës mund ta kufizojnë vetëm vendet anëtare”.
Ajo rikujtoi se punonjësit e disa konsullatave të vendeve të BE-së në Rusi janë dëbuar pas fillimit të luftës Rusi-Ukrainë. “Kjo e vështirëson që shtetasit rusë të bëjnë aplikime për viza. Kjo situatë duhet të merret parasysh”, tha Hipper.
Vendet anëtare të BE-së, Finlanda dhe Estonia kërkuan kufizim të udhëtimit në Evropë për shtetasit e Rusisë e cila është në luftë me Ukrainën.
Kryeministrja e Estonisë, Kaja Kallas ka deklaruar “Të vizitosh Evropën nuk është një e drejtë njerëzore, por është një privilegj”. Ndërsa kryeministrja e Finlandës, Sanna Marin tha: “Nuk është e drejtë që shtetasit rusë të vazhdojnë jetën normale në Evropë dhe të udhëtojnë si turistë ndërkohë që Rusia është agresore në Evropë dhe po bën një luftë të pamëshirshme”./FolDrejt/
