Bordi i Zyrës së Rregullatorit të Energjisë (ZRrE), është duke raportuar para Komisionit Parlamentar për Ekonomi, Industri, Ndërmarrësi dhe Tregti, në kuadër të Kuvendit të Kosovës, transmeton Fol Drejt.
Kryetari i Bordit Ymer Fejzullahu ka shpjeguar se si ka ardhur deri te një propozim i tillë, duke thënë se ndikim kanë pasur disa faktorë të jashtëm.
“Shitësit kryesorë janë konsumatorët që e konsumojnë energjinë elektrike për ngrohje. Dua të them edhe njëherë këtu për të gjithë që ndoshta këto çmime ekzistuese për një pjesë të kategorisë së konsumatorëve janë të papërballueshme, ZRRE-ja është pasivizuese për krijimin e fondit për konsumatorë por ne në vazhdimësi e kemi kërkuar krijimin e këtij fondi pasi deri tani mbështeten vetëm rastet sociale, mirëpo pjesë do duhej të ishin edhe konsumatorët e cenueshëm që nuk e përballojnë faturën e energjisë elektrike”, ka thënë ndër të tjera Fejzullahu.
Ai po ashtu ka krahasuar çmimin e importit të energjisë:
“Nëse e krahasojmë importin e këtij viti me ato të viteve të kaluara, çmimi është rritur për 50 herë, ndërsa kilovatët në dy-tri vitet e fundit kanë lëvizur nga 200 deri në 550 euro. Ka qenë e pamundur që kjo kosto nga ne, për shkak të rritjes enorme të çmimeve në bursat ndërkombëtare”, përfundon ai.
Ditë më parë, ZRrE në raportin e fundit konsultativ ka bërë shqyrtimin për ndryshimin e tarifave të energjisë elektrike në Kosovë.
Aktualisht në komision, deputetët janë duke e komentuar raportin e bordit, ndërsa po i vënë në pikëpyetje shumë segmente të këtij raporti./FolDrejt/
