Ndonëse ka filluar muaji tetor, ende nuk është bërë procedimi i pagave për muajin shtator në sektorin e arsimit.
Ndaj kësaj situate të krijuar ka reaguar edhe Asociacioni i Komunave të Kosovës, që përmes një postimi në rrjetin social facebook, kanë kërkuar nga Qeveria procedim të pagës së mësimdhënësve, transmeton Fol Drejt.
Në postimin e tyre ata kanë thënë se Ministria e Financave ka për detyrë vetëm procedimin e pagave dhe jo edhe marrjen e vendimeve të njëanshme, pa dakordim edhe me Komunat që konsiderohen si punëdhënësit.
Njëkohësisht, ata kanë thënë edhe se qasja e tanishme e nivelit qendror është në kundërshtim me praktikat e deritanishme të bazuara në ligjet e Kosovës.
Tutje, bordi i komunave i ka kërkuar Qeverisë që të veprojë me urgjencë në procedimin e pagave./FolDrejt/
Postimi i plotë:
AKK I BËN THIRRJE QEVERISË TË PROCEDOJ ME PAGAT E MËSIMDHËNËSVE
Bordi i Asociacionit të Komunave të Kosovës (AKK) me kujdes po përcjell situatën duke pranuar shqetësimet e Komunave, Kryetarëve të Komunave dhe Kolegjiumit të Drejtorëve Komunal të Arsim, për mosekzekutimin e pagave të mësimdhënësve nga Ministria e Financave, Punës dhe Transfereve (MPFT).
Bordi rithekson se Komunat janë punëdhënëse e përgjegjëse për vijueshmërinë në punë dhe përgjegjëse për ndalesat eventuale sipas legjislacionit në fuqi. MFTP-ja është vetëm ekzekutuese e pagesave, jo edhe ndërmarrëse e veprimeve të njëanshme pa asnjë vendimmarrje të punëdhënësit, në këtë rast Komunave.
Kjo qasje e nivelit qendror është në kundërshtim me praktikat e deritanishme të bazuara në ligjet pozitive në Kosovë. Deri më tani, në asnjë rast nuk ka ndodhë të kemi ndalesa të pagave të punëtorëve të asnjë sektori me të cilin menaxhojnë komunat, pa veprimin ligjor paraprak të vetë punëdhënësit.
Bordi i AKK-së i bën thirrje Qeverisë të veprojë urgjentisht në procedimin e pagave sipas akteve ligjore në fuqi dhe të praktikuara deri tani.
Komunat e Kosovës, padrejtësisht edhe kësaj radhe po goditen në këtë garë të panevojshme ku humbësit më të mëdhenj janë nxënësit e Kosovës.
Mos ekzekutimi i pagave është qasje e panevojshme dhe nuk shkon në dobi të stabilizimit të procesit arsimor.
